REGEST MABILLE: Charles-le-Chauve prend sous sa protection spéciale le monastère de Saint-Martin et renouvelle la confirmation des possessions et priviléges qu’il avait précédemment accordés à ce monastère.
REGEST EDITION: Dieses Regest ist nicht öffentlich zugänglich.
Datierung: MABILLE: 857 11 17; EDITION: 854 08 22
EDITION: Tessier, Georges (Hg.): Recueil des actes de Charles II le Chauve, Roi de France. Tome 1, Paris 1943 (Chartes et diplômes relatifs a l’histoire de France 8), S. 438-442, Nr. 167.
In nomine sanctae et individuae Trinitatis. Karolus gratia Dei rex. Si petitionibus servorum Dei pro quibuslibet ecclesiasticis necessitatibus aures nostras pulsantium libenter annuimus et ad divinae potentiae in locis Deo dicatis uberius famulandum auxilium porrigimus, id nobis procul dubio et ad mortalem vitam temporaliter deducendam et ad futuram feliciter obtinendam commodum provenire confidimus. Notum igitur esse volumus cunctis sanctae Dei Ecclesiae fidelibus et nostris, praesentibus scilicet atque futuris, quia venerandus grex peculiaris patroni nostri sancti Martini, ubi ejusdem praeclarissimi viri venerabile corpus quiescit, accedens reverenter ad nostram clementiam, deprecatus est ut ecclesiam praefati sancti cum omnibus hominibus vel aliis rebus sibi pertinentibus, de more parentum, regum videlicet praedecessorum nostrorum, sub nostrae immunitatis tuitione ac defensionis munimine recipere dignaremur. Addidit etiam jam dictus grex, id quod omnium plangit memoria, qualiter saevissimi atque crudelissimi Turonus supervenerint Normanni et lamentabili excidio concremaverint cum coeteris omnibus monasterium praefati sancti et ob hanc causam cartarum instrumenta ex rebus praefatae ecclesiae pertinentibus deperiissent. Unde et praefatus grex nostram summis nisibus petiit pietatem ut per clementiae nostrae relationis pancartam praenotatae ecclesiae cellas et villas pertinentes denuo reconfirmare studeremus. Cujus, inquam, rationabilibus et oportunis precationibus clementi favore annuimus ac proinde hoc serenitatis nostrae praeceptum fieri jussimus, per quod supra memoratam ecclesiam praefati domni Martini cum omnibus suis hominibus vel super terram ipsius, cujuscumque sint status, commanentibus, sive etiam cum omnibus aliis rebus sibi pertinentibus sub nostrae immunitatis tuitione ac defensionis praetextu recipimus, praecipientes atque jubentes ut nulli hominum, nostris nec futuris temporibus, saepe dictae ecclesiae monasterium aut cellas vel villas seu agros aut silvas sibi pertinentes liceat ingredi ad causas audiendas aut judicia saecularia terminanda, aut homines ejus, colonos sive servos vel ingenuos, super ipsius terram commanentes distringere aut inquietare aut fidejussores tollere, aut quamlibet illicitam redibitionem exigere praesumat ab eis. Cellae quoque vel villae crebro dictae ecclesiae beati Martini pertinentes quarum sunt nomina, id est sanctae Mariae in praedicto monasterio et matriculae ejusdem sancti, et sancti Stephani ac sancti Andreae atque sanctae Columbae seu sancti Sulpicii necnon sancti Clementis et sancti Johannis seu sancti Pauli atque sancti Petri necnon sanctae Crucis, simul etiam coeterae cellae extra monasterium sitae, id est sancti Pauli Cormaricensis et sancti Aredii atque Rodera coeteraeque quas perlongum est nominare, et villae ac diversae aliae res, scilicet in Austria, Neustria, Burgundia, <Alamannia>, Aquitania, Provincia, Italia, <Germania> et in coeteris regni nostri partibus ei juste legaliterque pertinentes vel in utilitatibus ejus consistentes, cum omnibus appendiciis earum per hanc nostrae magnificentiae reconfirmationem absque cujuspiam repetitione vel minoratione, immunitatis integritate nostris futurisque temporibus sub suorum rectorum maneant inviolabili potestate. Ut autem hoc praecellentiae nostrae praeceptum pleniorem semper in Dei nomine optineat vigorem, manu nostra subter illud firmavimus et de bulla nostra insigniri fecimus.
Signum Karoli gloriosissimi regis.
Bartholomaeus notarius ad vicem Hludowici recognovit et subscripsit.
Legimus.
Data XI kal. septemb., anno XV regnante Karolo glorioso rege, indictione I. Actum Turonis civitate. In Dei nomine feliciter. Amen.