Maurice l’Errable, qui revendiquait contre les moines la terre de Villatroe, dépendant du prieuré de Lancè, reconnaît, en présence d’Engebaud, archevêque de Tours, le mal fondé de sa réclamation et s’en désiste.
Datierung: 1148
In nomine sancte et individue Trinitatis, Patris et Filii et Spiritus Sancti. Ego Engebaldus, Dei gratia Turonorum humilis minister, per presentis paginule noticiam, omnibus fidelibus tam presentibus quam futuris notum fieri volo Mauricium de Errablio, quandam terram quam Villatroe vulgo nuncupatur, ad domum de Lanceio pertinentem, monachis Beati Martini Maioris Monasterii calumpniatum fuisse, et ob hoc terram illam incultam aliquandiu remansisse. Sed tandem prefatus Mauricius, divine miserationis omnes homines salvos fieri et neminem perire volentis, gratia respectus, pariterque formidans ne, propter iniuste calumpnie culpam, sortiretur imperpetuum iuste dampnationis vindictam, ante presentiam nostram constitutus, et terram quam supra memoravimus se iniuste calumpniatum fuisse recognovit, omnemque calumpniam illam monachis ex integro perdonavit. Et ut maior dictis ipsius fides posset adhiberi, manu propria super sanctum evangilium iuravit, quod iniuste terram illam calumpniatus esset, utpote qui prorsus in ea nichil iuris habuisset, nec patrem suum aut fratrem aut aliquem ex antecessoribus suis in ea quicquam iuris habuisse vidisset, nec alicujus relatione didicisset.