None
Datierung: 1032-1100
Notum sit cunctis fidelibus catholicis sanctae Dei ecclesiae curam gerentibus, de coliberto quodam nomine Haimelino, qui diu fugitivus a jugo servitutis sui domini fuerat; ad nutum cujus deinde redire ullo modo dum nollet, adhesit caulis ruris ut opilionis officio, pastoralique virga gregem ovium Sancti Martini episcopi et confessoris custodiret. Quibus obsequiis sicuti superius prefati sumus auditis. Sancti Martini monachi accepto consilio in claustro, perscrutaverunt a cujus dominio ille qui prenominatus, factus foret fugitivus. Quo percepto, ad Balgenciacum Castrum legatum quendam monachum nomine Isembertum direxerunt, ut Hildeburgis genitrix Odonis, quem Malas Erbas vulgus praenominat, predictum colibertum, Sancti Martini fratribus pro redemptione domini sui animae, et omnis sui generis animabus concederet, tali tenore, ut deinceps in orationibus Sancti Martini fratrum persisteret. Et quia levitate cordis sui a dominio servitutis predictus colibertus se abstraxisset, dederunt XXti solidos praedictae dominae, ut kartula firmior esset, et unicuique filiorum suorum XIIeim denarios, Huberto I solidum, Landrico I solidum, Odoni I solidum, et sorori suae Richildi I solidum, et inter famulos domus I solidum. Itaque prefata domina jam dictum colibertum fratribus Sancti Martini cessit; et filii filiaeque ejus cum ea, ut quaeque habebat, vel deinceps habere potuisset, in potestate Sancti Martini fratrum, nullo contradicente, sed Domino largiente, subjugarentur. Amen. Inde testes hi sunt: Godefridus de Bello Monte, Ernaldus famulus monachorum, Herveus viriderius et frater ejus Hugo. Arraldus nepos Odonis, Teodericus Bastardus, Golricus filius Andreae, Fulcherius clericus, Georgius, Guillelmus citarista, Girbertus pistor Odonis et Alguinus qui kartulam scripsit istam.