None
Datierung: 1199
Ego Sulpitius dominus Ambaziae, tam presentibus quam et futuris, notum facio, quod, Martinus Merceo, si ipse servitutis vinculo quocumque modo mihi obligatus fuerit, communi concensu Isabet, uxoris meae, et fratrum meorum Hugonis, Johannis et Willielmi et sororum mearum, Isabet Comitissae Engolismensis, et Dyonisiae, pro amore Dei et remedio animae dominae Matildis, felicis memoriae, karissimos matris meae, ipsum et ipsius heredes, cum universis rebus et possessionibus suis, ab omni servitute absolvo, et ubicumque terrarum abire voluerint, liberam eundi licentiam concedo; et ne libertas ista ab aliquo, in posterum, perturbari vel calumniari possit, ego hanc, ad ipsius Martini et amicorum suorum petitionem, litterarum memoriae commendavi, et sigilli mei munimine communivi, et signo dominicae crucis confirmavi. Quod viderunt et audierunt: Hamelinus episcopus Cenomanensis, Johannes episcopus Dolensis, Seincellus abbas de Pontilevio, Petrus abbas de Fontanis, G. abbas de Stella, Willielmus de Monte Leonis, Humbardus Jai, Hugo Jai. Actum publice apud Fontanas, die qua ibidem sepulta fuit domina Matildis venerabilis memoriae mater mea, anno gratiae MoCoXCoIXo, Philippo rege Francorum, Johanne rege Anglorum, Arturo comite Andegaviae, Bartholomeo Turonensi archiepiscopo.
Sig. Sulpitii. Sig. Hugonis. Sig. Johannis. Sig. Willielmi. Sign. Isabet dominae Ambasiae. Sig. Isabet comitissae Engolismensis. Sig. Dionisiae.