None
Datierung: 1136
Quisquis sibi a Domino nexum peccaminum remitti desiderat, consequens est ut subditorum sibi debitae vincula servitutis absolvat. Quocirca, in amore omnipotentis Dei, ego Haimmairicus, cognomine Gaimurdus, de Lavarzino juvenilis dominus, assentiente mihi sorore mea Beatrice, pro anima patris mei Salomonis, huic famulo meo Bertranno libertatem concedo, quatinus ubicunque in quatuor mundi partibus voluerit, veluti liber et quietus, abeat. Si quis autem hanc libertatem quassare voluerit, iram Dei omnipotentis et beatae Mariae virginis omniumque sanctorum incurrat, auri centum libras examinati persolvat et nullum obtineat effectum. Data est autem haec libertas apud Lavarzinum, super defuncti Salomonis tumulum, vivente Philippo rege Francorum, et Gaufrido comite Vindocinense ad Jerusalem abeunte.
His videntibus et audientibus: Salomone de Fracta Valle, Paulino, Hugone de Pontiaco, Euvrardo et filio ejus Giraudo, Ragenaudo Seseptimo, Golando et fratre ejus Gaufrido, Pagano de Bessiaco, Petro de Votluca, Gaufredo de Marriaco, Guillelmo de Buziaco, Gilduino, Hugone Nigra Boella, Gaufrido de Turmiaco, Hainrico de Cergis et fratre ejus Hildeberto, Fulcodio et fratre ejus Huberto, Caroo, Gaufrido, Richerio, Ulgerio sacerdote qui habuit inde quinque solidos de Bertranno propter XXXta missas ad animae requiem defuncti Salomonis, Guillelmo sacerdote capellario, hujus vero cartulae Arraudo sacerdote scriptore. Adhuc, Gibuinus, Gaulerius.