Notum sit omnibus quod ego Rotbertus Burgondus, Sablolii castri dominus, vadens in Jerusalem cum exercitu christianorum in secunda scilicet profectione que facta est anno ab Incarnatione Domini MXCVII, Urbano II romano pontifice et Philippo Francorum rege, preterii per Majus monasterium et, susceptus a monachis ipsius loci reverenter, in crastino intravi in capitulum ipsorum oraturus eos ut in orationibus suis ad Deum mei misericorditer recordarentur. Ubi coram domno Rodulfo Carnotensi, tunc priore, capitulo ipsi presidente, quia Bernardus de Sancto Venantio in abbatia ipsa quintum decimum annum ab ordinatione sua agens tunc aberat, et coram universis etiam astantibus tam monachis quam laicis ad hoc ipsum audiendum et videndum admissis, feci mentionem donorum quorumdam que nuper Sablolii monachis ipsis partem per manum memorati abbatis sui, partim per manum domni Alfredi, prioris Sabloliensis, annuente Rotberto, filio meo, et Berta, conjuge mea, de quibusdam rebus meis feceram, eadem auctorizans et confirmans. Costumas etiam in burgo Sancti Nicolai Sabloliensis mihi a principio retinueram, et quas eis dare Sablolii volueram sed ipsi eas utpote monachi paci studentes et concordie suscipere noluerunt eo quod filium meum sepedictum Rotbertum invitum concedere senserant, ibi in capitulo ipsorum positus, ut prefatum est, dedi eis et concessi, in misericordia tamen ipsius filii mei, addens eidem dono similiter, id est in misericordia ejusdem Rotberti, tres mansuras terra que vocatur de Landa, post obitum Berte conjugis mee ab ipsis possidendas. Quod ideo feci et ea intentione ut nulli alii homini vel ecclesie liceat eas vendi sive dari nisi tantum ipsis, id est monachis monasterii, quibus ego donum inde per annulum quemdem aureum feci, ponens illud in manu Rodulfi eorum prioris. In crastino quoque altero posui super altare dominicum ecclesie ipsius loci horum omnium que pridie in capitulo dederam et concesseram, donum et concessionem unde et sepefatum filium meum Rotbertum per literas rogavi ut libenter annueret propter Deum et mei gratiam huic mee donationi. Nam sciendum quod Rainaldus de Credono castro, filius meus senior, concesserat mihi et eis quibus facerem omnes eleemosynas quas in hoc meo itinere erogarem, de quibus tamen Rotbertus, frater suus, nihil haberet pecunie. Testes qui hoc audierunt et viderunt et sive in capitulo facte sive super altare posite donationi interfuerunt, sunt isti: ex parte mea, Bartholomeus capellanus, Harduinus de Vionio, Drogo de Troinniaco, Albericus filius Garnerii, Arnulfus de Sagio, Rainaldus de Baicio, Gausfredus de Dalmariaco, Gaulterius de Sancto Lupo, Harduinus de Monteborri, Picardus filius Jordanis. Hi sunt ex parte mea; ex monachorum vero, Sancelinus cellararius, Mainardus sanguinator, Odo de Fontanis, Ansegisus bocherius, Martinus de Boeria, Rotbertus de Sancto Medardo, Petrus de Sartrino, Herbertus Rigodetus, Gausfredus Abjetus, Rotbertus Tortum capellum, Rainaldus frater Landrici coci, Arraldus nepos Hilduini, Rainaldus de Losardeno, Petrus Barba.