None
Datierung: 1300 und 1301
Universis presentes litteras inspecturis, Johannes miseratione divina Carnotensis episcopus, salutem in Domino sempiternam. Notum facimus nos, litteras religiosorum nostrorum fratrum capituli Maioris Monasterii Turonensis et fratris Odonis, eiusdem loci abbatis, infra scriptas, eorum sigillatas sigillis, non abolitas, non cancellatas, nec in aliqua sui parte viciatas, vidisse, et de verbo ad verbum legisse, formam que sequitur continentes: Universis presentes litteras inspecturis, fratres capituli Maioris Monasterii Turonensis et frater Odo permissione divina minister humilis eorumdem, salutem in Domino. Cum reverendus in Christo pater Johannes Dei gratia Carnotensis episcopus ad supplicationem nostram duas parrochiales ecclesias Sancti Salvatoris et Sancti Egidii de Montigniaco iuxta Cloyam, sue diocessis, propter ipsarum tenuitatem reddituum, de assensu nostro unierit, et de illis unam parrochialem ecclesiam constituerit, ut ex earum proventibus unus possit sacerdos sustentari commodo in futurum, et ipse dominus episcopus post modum ad dictam ecclesiam de Montigniaco sic unitam, tunc liberam et vacantem tam per mortem defuncti Richardi quondam rectoris Sancti Salvatoris predicti quam per liberam resignationem Johannis dicti Bride, quondam rectoris Sancti Egidii predicti, Johannem dictum Pourpie presbiterum sibi ad ipsam ecclesiam de Montigniaco sic unitam, a nobis prout moris est presentatum, ad eandem ecclesiam admiserit, ipsumque de cura ipsius ecclesie sic unite, presenti aliter investierit. Nos postea cum ipso Johanne rectore ecclesie sic unite, pro utilitate nostra et prioratus nostri de Montigniaco predicto, necnon pro utilitate evidenti ipsius ecclesie sic unite, fecimus et concessimus quandam permutationem sub hac forma: videlicet quod nos de communi assensu nostro et nomine nostro ac prioratus nostri predicti nomine permutationis, quitamus et dimittimus penitus in futurum predicto rectori et eius successoribus rectoribus pro tempore in dicta ecclesia sic unita duas partes oblationum, videlicet denariorum, panum, candelarum et decimarum lanarum, agnorum, porcorum, vitulorum, equorum et ortorum, et omnium minutarum decimarum quarumcunque; in quibus duas partes seu aliquam partem percipiebamus et habebamus ante unionem predictam per nos aut priorem dicti loci, seu per mandatum nostrum aut mandatum dicti prioris, cum dictis duobus rectoribus quondam existentibus in dictis ecclesiis sic unitis, necnon et quandam peciam orti seu virgulti ad dictum prioratum pertinentem, prout se comportat seu possidetur in longum et latum a fixura chori ecclesie Sancti Egidii predicti recte usque ad cuneum domus seu celarii Gervasii dicti Robillart, tendentem ad domum relicte Theobaldi de Favellis. Hoc tamen nobis et dicto prioratui nostro salvo et retento quod si bladum, fabe et pisa in dictis ortis semmentur, decima illorum predicto nostro prioratui perpetuo remanebit. Et predictus rector ex causa permutationis huiusmodi quitat nobis et dimitat penitus in futurum a dicto prioratui nostro de Montigniaco et priori eiusdem loci tres modios bladi annui redditus, quos percipiebant dicti duo rectores quondam existentes in dictis ecclesiis sic unitis, nomine annui redditus in prioratu predicto, et quandam peciam terre sitam retro prioratum predictum, iuxta vineas dicti prioratus ex una parte, et iuxta vineam defuncti Guerini dicti Plum Loie ex altera, continentem unum sextarium sementis cum boissello vel circa ad mensuram dicti loci, pertinentem ad ecclesiam Sancti Egidii supradicti. Ad que premissa tenenda fideliter in futurum nos et monasterium nostrum ac dictum prioratum et eius bona specialiter obligamus. Et supplicamus reverendo patri dicto domino Johanni Dei gratia episcopo Carnotensi, ut ipse premissa sua velit auctoritate diocesana cum decreti sui interpositione confirmare. In cuius rei testimonium et munimen presentes litteras eidem rectori dedimus sigillorum nostrorum munimine roboratas. Datum anno Domini Mo CCCo, die sabatti post hyemale festum sancti Martini. Nos vero dictorum religiosorum supplicationibus inclinati, inquisitione nostra super hoc prehabita diligenti, ac sepedicte ecclesie utilitate pensata predicte permutationi,prout in litteris annotatis superius continetur, nostrum assensum prebuimus et prebemus, eamque auctoritate diocesana approbamus, laudamus, ratificamus et etiam confirmamus, decretum nostrum super hoc apponentes. In quorum omnium testimonium et munimen presentibus litteris sigillum nostrum duximus apponendum. Datum apud Bercherias, domum nostrum, anno Domini Mo CCCo, die dominica post festum purificationis beate Marie Virginis.