None
Datierung: 993
In nomine sanctae et individuae Trinitatis. Rainoldus, non meis exigentibus meritis sed gratia praeveniente Redemptoris Parisiacensis episcopus, notum fieri volo omnibus coepiscopis nostris, presbyteris, diaconibus, seu cunctis utriusque ordinis clericorum scilicet et monachorum tam praesentibus quam et futuris, perventura tempora succedentibus, qualiter monachi Sancti Martini Maioris Monasterii nostram serenitatem adierunt, humiliter deprecantes, ut ob amorem Dei omnipotentis, et sanctae Mariae eius genitricis, simulque praenominati confessoris Martini et ut memoria nostra ac successorum nostrorum in eo loco perpetualiter habeatur, quandam terram de altare Sancti Stephani Parisiacensis, haud longe ab urbe iuxta ecclesiam Sanctae Genovefae, eis in perpetuum possidendam concederemus; quod ita fecimus, Burchardo comite, cui pertinere videtur, assensum praebente, eo videlicet ordine, ut unoquoque anno, in missa sancti Martini hibernali, in census solidos V. persolvant: et si neglegentes extiterint, legaliter emendent, et absque ulla inquietudine alicuius episcopi seu alicui homini ab hodierna die et deinceps monachi inibi Deo famulantes praefatam terram et quicquid ad eam pertinere videtur secure teneant atque possideant. Consistit autem haec terra in pago Blesiacense, in villa quae dicitur Gilliacus, quatuor quartae et in Maniaco una quarta et in villa Levirs una. Et ut haec descriptio maiorem per tempora optineat vigorem, coram nostris fidelibus manu propria eam firmavimus, manibusque nostrorum fidelium cunctorumque canonicorum corroborandam tradidimus. Si quis autem, quod futurum non credo, post mortem nostram aut episcopus nostro loco succedens, seu aliqua persona, contra hoc scriptum surgens, infringere conaverit, sciat se ex auctoritate patris et filii et spiritus sancti et sanctorum Patrum, necnon et ex ministerio nostro excommunicatum. Actum Parisius XVIII Calendas Aprilis, anno VIII regnante Hugone serenissimo rege, episcopatus nostri IVo. S. Rainoldus Parisiorum episcopi, S. Burchardi comitis, Ilarius decanus, Elisiernus archidiaconus, Albericus archidiaconus, Warinus archidiaconus, Huncbaldus, Ansoldus, Ermarus, Udoldus, Adelelmus, Ingelardus, Clarembaldus, Hucdo, Erbertus. Hildodus cancellarius hoc scriptum se praesente fieri iussit.