Payen de Saint Léonard après avoir reconnu les limites de ses terres, donne à Marmoutier tout ce qu’il possédait à la Vacherie, du consentement de sa fenme et de ses enfants.
Datierung: 1108
Nouerint presentes et posteri, maxime successores nostri maioris monasterii monachi, quod anno dominice incarnationis M. C. VIII, agentibus nobis sub domno abbate Willelmo anno III, cum domnus Ludouicus Gausbertus obedientiam de Uaccaria procuraret, erat quedam contentio inter nos et Paganum de Sancto Leonardo, de quadam parte terre, que adiacet inter terras de Uaccaria et suas. Cumque in huiusmodi contentione aliquandiu consisteremus, tandem ex utraque parte concessum est, ut domnus Gausbertus Ludouicus, et predictus Paganus cum suis diuisoribus super ipsam terram, de qua erat contentio, uenirent. Venerunt itaque et fecerunt perambulari et proculcari illam terram, et certa diuisione et equali ita diuisa est, ut ex utraque parte diuisio ipsa concederetur, et ne deinceps exinde aliqua oriretur controuersia, concordatum est ut per ipsam diuisionem mete ponerentur, et sic in pace remanserunt. Postea uero apud montem Folet, in domo sua, ipse Paganus dedit et concessit per predictum Gausbertum monachum nostrum, Deo et nobis monachis scilicet maioris monasterii beati Martini, pro anima sua, quicquid habebat apud Uaccariam, scilicet decimam et cetera que ad ecclesiam Sancti Leonardi pertinebant, simulque terram presbiteri. Hec autem omnia, scilicet diuisionem predicte terre, decimam et cetera que ad ecclesiam pertinent, et terram presbiteri concesserunt nobis, in eadem presentia, tam uxor eiusdem Pagani, nomine Aremburgis, quam filii et filie eius, quorum hec sunt nomina: Petrus, Girardus, Maria, Haduisa, Berta. Sed ad maiorem euidentiam et certiorem cognitionem, dedit domnus Gosbertus predictis filiis Petro et Girardo singulos denarios, Marie autem V denarios, Haduise unum, Berte similiter unum. Cuius rei sunt isti teste. Ex parte eorum Matheus frater ipsius Pagani. Ex parte uero nostra Herbertus de Manso, Hubertus dispensator de Montefoleto, Rainardus de Loiriaco.