«Copie du titre de donation d'une terre à deux bœufs située une partie à Lescher et l'autre à Vilpète, au prieur de Saint-Martin de Lauerdin par Drogo de Bucellis.»
Datierung: 1032-1064
Omnibus quibuscumque succedentibus clericis ex mundi naufragio ad huius verae salutis portum divina applicuerit pietas, litteris volumus notificari, per quos benefactores hujus loci maioris scilicet monasterii res auctae et ampliatae, ut dum noverint quorum adminiculo congregationis corpus in Christi militia temporaliter sustentetur, animabus eorum rependere non negligant, unde et eternaliter consolentur; sic namque et fideles ex suorum oblatione optatum sentient remedium, et si quando in eam calumniatores insurrexerint facilius improbabuntur, scripto eis opposito, quod de suo quisque fieri voluit in testimonium; proinde quaeque a singulis maiora huic loco collata sunt in singulis notata sedulis inveniri poterunt. In hac autem notatum sciat omnis posteritas futurorum, quod Drogo de bucellis et Annua uxor eius, dederint sancto Martino maioris monasterii, terram ad duos boves ab omni consuetudine liberam, que sita est in duobus locis appellatis vulgariter uno Lescheri altero Villapeta, et ipsam terram ad presens dimidiam annuum, post suum vero obitum totam derelinquunt, propter quam rem donaverunt illi domnus Albertus et fratres societatem et partem omnium bonorum quae agunt. Huius rei testes existunt ii quorum nomina haec sunt:
Hubertus rodulfus, vilinus. Amillus trichericus. Garinus clericus. Arnulfus sartor. Welterius celerarius. Hilduinus sartor. | Gausfredus coqus. Salomon coqus. Hildebertus coqus. Durandus sanguinator. |