Les chanoines de Marmoutier donnent à cens à Gunther chanoine et à Berald son fils plusieurs terres situées à Chouzy.
Datierung: 980
In nomine Summi Salvatoris Dei, nos quidem canonici congregationis sancti Martini majoris monasterii, videlicet Huddo decanus, Arduinus thesaurarius idemque archiepiscopus, Aszo prepositus, ceterique alii fratres in eodem monasterio Domino famulantium, notum immo et percognitum fore volumus cunctis sanctae Dei ecclesiae fidelibus, precipueque nostris successoribus, quoniam deprecatus est nos quidam homo, nomine Beraldus, uti ex rebus stipendii nostri jure deputatis aliquid, hoc est quartam I cum aripennibus IIII, de terra sub institutione census per hujus nostrae auctoritatis testamentum concederemus, quorum petitionem benigne recipientes concessimus illis prescriptam quartam sitam in pago turonico, ex potestate sancti Martini majoris monasterii, in villa Cansiaco, cum vineis, terris, pratis, pascuis cultis et incultis, et quicquid ad eamdem quartam pertinere videtur, cujus fines et terminationes infra ipsam potestatem per diversa noscuntur esse loca, eo etiam modo prefatam quartam, cum omnibus suis utilitatibus usu fructuario eis concedimus, ut habeant licentiam desuper quicquid melius elegerint emeliorandi, solventes exinde singulis annis ad missam sancti Martini, quae celebratur III. idus Novembris, partibus fratrum censum solidorum V, et eis amplius non requiratur, sed sub tali censu, diebus quibus vixerint, libere ac quiete possideant, nemine inquietante atque contradicente. Et si de eodem censu tardi aut negligentes reperti fuerint id ipsum emendare studeant, et quod tenuerint, non ideo amittant. Post amborum quoque a presenti carne digressum, uni solummodo successori prefixam terram sub prelibato censu licentiam habeant dimittendi. Ut autem haec manus firma pleniorem obtineat vigorem, manibus propriis eam omnes subter inserti tangendo firmavimus, atque corroboravimus. Huddo decanus subscripsit, Arduinus archiepiscopus idemque archidiaconus subsciripsit, Aszo praepositus. Galterius, nosque praecentor, Constantius, Ainardus, Rotbertus, Reinaldus, Benedictus, Marinus, Dacfredus, Guido, Gausbertus, Arnulfus, Vivianus, Burchardus, Fredericus, Adelelmus, Beraldus. Data est autem haec auctoritas mense Martio, sub magno rege Clothario anno scilicet XXV regni ejus, quando impetum fecit contra saxones et fugavit imperatorem. Hingmarus gregis S. Martini autographus.