Ludwig bestätigt dem Abt Hildebald von Stablo-Malmedy die Verleihungen des Königs Sigibert und der früheren Könige, namentlich die Villa Germigny im Gau von Châlons.
Datierung: 877 05 26
In nomine sancte et individue trinitatis. Ludouuicus divina favente clementia rex. Si peticiones sacerdotum ecclesiarum dei, quibus dignitatem celsitudinis nostre digne laudabiliterque postulaverint, ad effectum perducimus, regiam consuetudinem exercemus et propter hoc dominum deum retributorem nos habere confidimus. Ideoque venerabilis vir Hildebaldus abba de monasteriis Stabulans et Malmundarii, que sunt in honore sancte Marie sanctorumque apostolorum Petri et Pauli vel ceterorum sanctorum a bone memorie domno scilicet Sigiberto rege ob amorem Christi de foreste nostra et fiscis super fluvium Amblauiam constructam, clementie nostre aures monstravit, qualiter ipse princeps et rex pro mercedis suae impendio et eterna retributione villas aliquas tam ultra Ligerim quam alias res proprias, quas dominus Remaclus legitime possedit, seu ceteras preceptiones sua manu roboratas sub integra emunitate absque introitu advocatorum concessit. Unde et ipsas preceptiones seu et confirmationes procedentium regum memoratus abba se pre manibus habere affirmans petiit celsitudinem nostram, ut tam id quod ipse princeps domnus Sigibertus de fisco suo seu reliquis locis, que ad ipsa monasteria per suas auctoritates noscitur concessisse, quam etiam quod ad supra scripta monasteria a Christianis hominibus noscitur collatum fuisse et quod presentis temporis evo eorum subest possessioni et dominationi, ut hoc ipsum ipsis monasteriis dignaremur etiam nostra regali confirmare auctoritate. Cuius peticioni non solum pro reverentia ipsius venerabilis viri, sed et pro devotione monachorum, qui in eisdem locis domino videntur famulari, accommodantes aures nostre serenitatis, iuxta peticionem eius noverint omnes fideles nostri tam presentes quam et futuri, non solum quod nos postulavit confirmasse et roborasse, sed et villam dominicationis olim regie Germinei nomine sitam in pago Katalaunense pro remedio anime nostre nos renovasse cum mansis terris edifitiis campis pratis pascuis silvis cultis et incultis aquis aquarumve decursibus viis et inviis exitibus et regressibus precipientes et firmiter statuentes, ut, sicut constat a iam dicto principe domno Sygiberto rege vel a sibi succedentibus regibus usque in presens roboratum ipsis monasteriis et confirmatum, sic deinceps in posterum maneat inconvulsum. Et ut hec nostra concessio et auctoritas firmior in posterum habeatur et melius a fidelibus nostris credatur, manu propria eam subter firmavimus et anuli nostri inpressione insigniri iussimus.
Signum domni Ludouuici (M.) invictissimi regis.
Data VII kal. iunii anno dominice incarnationis DCCCLXXVII, indictione x, anno I domni Hludouuici serenissimi regis in orientali Frantia.
Walkerus cancellarius vice Liuthberti archicancellarii recognovi.