Ludwig schenkt dem Kloster Lorsch den Ort Aberinesburg im Lobdengau wie er ihn seiner Gemahlin Liutgard verliehen hatte.
Datierung: 882 01 18
Ausstellungsort: Frankfurt
In nomine sanctae et individuae trinitatis. Hludouuicus divina favente gratia rex. Notum esse volumus omnibus sanctae dei aecclesiae fidelibus nostrisque presentibus scilicet et futuris, qualiter nos ob amorem domini nostri Iesu Christi et pro anima pii genitoris nostri et pro mercedis nostrae augmento quasdam res proprietatis nostrae concedimus ad monasterium dictum Lauresham, quod est constructum in honore sancti Nazarii venerabilis martyris Christi, cui nunc venerabilis abba Waltherius preest, hoc est in pago nuncupato Lobodengouue locum quendam qui nominatur Aberinesburg, sicuti ipsum carissimae coniugi nostrae Liutgardi hucusque prestitum habebamus, et quicquid ad ipsum locum iure ac legitime pertinere videtur cum domibus aedificiis mancipiis vineis campis agris pratis pascuis silvis cultis et incultis aquis aquarumve decursibus viis et inviis accessibus et adiacentiis finibus exitibus et regressibus. Hec igitur omnia iam dicto abbati ad prefatum monasterium et fratribus ibidem domino famulantibus in proprietatem et dominationem perpetuam condonavimus. Et iussimus eis fieri hoc nostrae auctoritatis preceptum, per quod volumus firmiterque precipimus, ut de his omnibus nunc et deinceps omni tempore liberam habeant potestatem faciendi quicquid eis placuerit, quatinus eos pro nobis coniuge proleque nostra misericordiam domini melius exorare delectet. Et ut hec nostrae concessionis auctoritas firmior habeatur et per futura tempora a fidelibus nostris melius credatur et diligentius observetur, manu propria nostra subter eam firmavimus et anuli nostri impressione assignari iussimus.
Signum Hludowici (M.) serenissimi regis.
Arnolfus cancellarius advicem Liutberti arehicapellani recognovi et subscripsi.
Data XV kal. febr. anno dominicae incarnationis DCCCLXXXII, indictione X, anno VI Hludouuici serenissimi regis; actum Franconofurt palatio regio; in dei nomine feliciter amen.