In nomine domini nostri Iesu Christi. Hludovicus divina ordinante gratia Romanorum imperator augustus. Si erga loca divino cultui mancipata nostrae munificentiae fundamus obsequia ad sustentionem videlicet servorum dei ibidem famulantium, non solum regium morem decenter implemus ipsosque in nostris orationibus efficimus, verum etiam et nobis prosperitatem presentis vitae et aeterna gaudia liquido confidimus. Quapropter noverit omnium fidelium sanctae dei aecclesiae industria nostrorum presentium ac futurorum, qualiter quidam vir venerabilis Ueronensium episcopus Adhalhardus per admonitionem dilecti dapiferi nostri aures nostrae serenitati pulsando adiit postulans, ut quasdam res nostrae proprietatis ad sanctam dei aecclesiam, cui ipse episcopus preesse dinoscitur, ad supplementum aecclesiastici ministerii traderemus. Nos autem admonitiones huiusmodi illatas iustas ac salutiferas agnoscentes dedimus ad prefatam aecclesiam, quae est in honore sancti Zenonis constructa, curtim nostram, quae dicitur Ripa, prope lacum Gardianense, qui et Genacus dicitur, sita cum omnibus suis pertinentiis et adiacentiis, cum domicoltibus et aedificiis omnibus, cum agris cultis et incultis vineis pratis pascuis silvis piscationibus venationibus viis et inviis aquis aquarumque decursibus molendinis exitibus et reditibus et cum universis pertinentiis mobilibus et inmobilibus quesitis et inquirendis, quatinus et omnia per hanc nostram auctoritatem ad prefatam dei aecclesiam ob nostram eternae salutis mercedem perpetualiter pertineant, nullo amplius, quod absit, successore nostro hanc nostram divinitus inspiratam donationem inmutante vel minorante, set liceat prefato episcopo suisque successoribus ab hodierna die et deinceps easdem res in omnibus ita regere ac disponere nec non et ordinare, prout sibi libitum sit utque utilitas ipsius ecclesiae deposcit, quatinus ex ipso licet pauco donationis augmento eisdem servis dei Christo Iesu ibidem famulantibus aliquantulum maioris mercedis excrescat consolatio et nostra ac piorum parentum nostrorum iugis in perpetuum maneat oratio. Si quis vero, quod fieri non credimus, contra hanc nostram auctoritatem ire temptaverit aut in aliquo violare ausus fuerit aut per aliquam violentiam vel fortiam easdem res invadere presumpserit et servos vel ancillas in aliquo iniuste constrinxerit, mille mancusos auri optimi coactus exsolvat, medietatem camere nostre et medietatem ad eandem domum dei. Et ut haec auctoritas nostrae donationis per futura tempora firma habeatur, manu nostra subtus eam firmavimus et sigillo nostro sigillari iussimus.
Signum manus domni Hlodowici (M.) serenissimi imperatoris.
Ego Sigifredus clericus ex iussu imperiali recognovi.
Data II kl. augusti, anno dominicae incarnationis DCCCXXXVI, imperii vero domni Hlodovici VII, indictione VIII; actum Papie; feliciter amen.