In nomine domini nostri Iesu Christi dei eterni. Lodouicus gratia dei rex Francorum atque Langobardorum omnibus episcopis abbatibus ducibus comitibus iudicibus castaldiis actionariis vicariis centenariis vel reliquis fidelibus nostris presentibus scilicet et futuris. Maximum regni nostri in hoc augere credimus munimentum, si petitionibus sacerdotum atque servorum dei, in quo nostris auribus fuerint prolate, libenti animo optemperamus atque ad effectum perducimus, regiam consuetudinem exercemus et hoc nobis ad mercedis augmentum vel stabilitatem regni nostri in dei nomine pertinere confidimus. Quapropter noverit sollertia vestra, qualiter ad petitionem nos religioso viro Berthario abbati ex monasterio sancti confessoris Christi Benedicti, quod est constructum in loco, qui dicitur Casinum castrum, tale beneficium in ipsum monasterium visi fuimus concessisse, unde monachi deo servientes et pro nobis et cuncto populo christiano exorantes vivere valeant. Id est ipsa curte pertinentes sacri nostri palatii in loco, qui dicitur Tartoritu, id est Laianu et sanctum Georgium; unu latu flumen, qui dicitur Uiperata et pergit in pede de monte Auriu, aliu latu flumen, qui dicitur Saline, unu capu tenet in mare, aliu capu terra sancti Benedicti, qui vocatur Laianellu. Hanc enim curtem per has fines concessimus in eodem monasterio cum servis et ancillis, cum pratis et pascuis, cum silvis et montibus et cum omnia intro habentibus, cum viae suae intrandi et exiendi; haec superius comprehensa eiusdem sancti loci potestati perhenniter possidendum conferimus. Precipientes ergo iubemus sicuti et perhenniter mansurum volumus, ut nemo fidelium nostrodum parti prescripti monasterii de his omnibus rebus quolibet in tempore nullam inferre presumat molestiam aut contrarietatem, sed sub omni integritate, sicuti ibidem a nobis concessum est et hanc nostra auctoritate condonante, perhenniter ibi ad utilitatem eiusdem maneant monasterii atque cuiuslibet refragatione aut qualibet inquietudine. Ut quoque haec nostra auctoritas pleniorem optineant vigorem et a fidelibus nostris diligentius observetur veriusque credatur, manu propria subter eam firmavimus et anuli nostri impressione acsignari iussimus.
Signum (M.) Lodouici gloriosissimi regis.
Dructemirus subdiaconus atque notarius advicem Egilmari recognovi.
Data nono kal. martias, anno Christo propitio imperi domni Lodouici pii imperatoris septimo decimo, indictione XIII; actum civitate Beneuento; in dei nomine feliciter amen.