In nomine domini nostri Iesu Christi dei aeterni. Hludouuicus gratia dei imperator augustus invictissimi domni imperatoris Hlotharii filius. Dignum est, ut, qui prudenter dei obsequia ordinare procurant et hoc ad stabilitatem perpetuam nostram corroborationem confirmare exposcunt, ut tanto libentius obaudivimus, quanto et deo placita intelligimus et prudentia deo protegente bono studio ad effectum perducere procuravimus. Igitur omnium fidelium sanctae dei aecclesiae ac nostrorum praesentium scilicet et futurorum comperiat sollertia, quia, dum nos dilecto fideli nostro Adalberto coenobium domini Saluatoris in monte Amiate constitutum ad regendum conmisissemus et ibidem neglecta dei obsequia et procuratione deo ibidem famulantium praedecessorum suorum incuriam multis modis repperisset, studiosius decertavit congregationem monachorum ibidem deo servientium regulariter corrigere et solummodo divinis obsequiis deditos ad sufficientiam suorum largire, quatenus praelatus iam fati monasterii domini Saluatoris, qui per tempora fuerit, ac successorum illius abbati vel praepositi cum subiectis monachis suorum inibi deo servientium deinceps in futurum sufficienter habere mereantur, ob amore dei remediumque animarum nostrarum ac successorum nostrorum regum aut imperatorum conferens eis ad sufficientiam suorum cellam sancti Benedicti, curte de Palea, cellam sancti Stephani in Monticlo et cellam sanctae Mariae in Lamulas, curticellam de Mustia nec non et curticellam de Titinano et in Cerri angariales seu et in Feroniano et manentes eius nec non et cellam sancti Saluatoris de Uallerachana et curticella de Cuniclo cum ipso Cagiolo de Portiano et cellam sancti Stephani in Terquini seu et cellam sancti Seueri super lacu cum ipsa curticella de Bisentio, cellam etiam sancti Miniati nec non et cellulam sanctae Mariae de Ualeriano cum ipsas res de Curticiole, cum omnibus pertinentiis et adiacentiis earum, ea videlicet ratione, ut ab hanc in futurum praedicta sancta congregatio his omnibus denominatis cellulis et curtibus cum suis omnibus pertinentiis et adiacentiis tantummodo suis utilitatibus habentes victum vestitumque regulariter sumentes absque ulla dilatione solummodo divinis die noctuque persistant obsequiis ac pro stabilitate totius imperii nobis a deo commissi studeant exorare. Sed, quod bono studio bonaque voluntate fecit, perennem habeat stabilitatem, petiit pietatem nostram, ut eandem ordinationem nostram confirmaremus conscriptionem, sicuti et fecimus. Denique etiam concedimus praedicto monasterio omnia decima frea et iudiciaria vel omnem compositionem et exibitionem publicam ex omnibus manentibus de supra memoratis cellulis et curtibus ob remedium animae nostrae successorumque nostrorum regum vel imperatorum, qui per tempora fuerint, ad portam ipsius monasterii conferendam semper ad usus peregrinorum sustentandos in elimoniam et augmentum animarum nostrarum propter oppressiones malorum ac pravorum hominum, quae sufferre minime nec sustentare potuerant. Quapropter eidem sancto loco hoc nostrum praeceptum fieri iussimus, per quod praecipimus, ut ab hinc in futurum eadem sanctae congregationi omni quietudine absque ullo publico repetitu aut rectoris loci ipsius subtractu easdem cellulas et curtes in suis utilitatibus ac necessitatibus habeant et ordinent, faciant et disponant, quatenus exinde sufficientiam habentes in divinis obsequiis et nobis eorum famulatio proficiat sempiternale remedium. Si quis vero, quod futurum minime credimus esse, quilibet homo magna parvaque persona contra hoc nostrum imperiale muniminis praeceptum temerario ausu contendere aut inrumpere, molestare aut inquietare seu evacuare vel diminorare aut etiam inbeneficiare predictas cellulas et curtes praesumpserit aut aliqua violentia quandoque tempore inferre praesumptor extiterit, sciat se compositurus argenti lib. XXX et auri ebrizi lib. V, medietatem palatio nostro et medietatem eisdem aecclesiae rectoribus. Et ut haec nostrae auctoritatis praeceptum futuris temporibus domino opitulante valeat inconvulsum manere, manu propria subter firmavimus et anuli nostri inpressione subter insigniri iussimus.
Signum (M.) domni Hludouuici serenissimi imperatoris augusti.
(C.) Hericus domni imperatoris cancellarius advicem Dructemiri archicancellarii recognovi et (SR.)
Data IIII non. iul., anno Christo propitio imperii domni Hlotharii pii augusti [XXX]IIII et Hludouuici gloriosissimi imperatoris in Italia IIII, indictione I; actum Papia civitate palatio regio; in dei nomine feliciter amen.