In nomine domini nostri Iesu Christi dei eterni. Hludouuicus divina ordinante providentia imperator augustus. Cunctis sanum sapientibus liquet, quia quo magis cultibus divinis insistimus, eo amplius superne maiestati reconciliamur. Proinde universorum sancte dei eclesie nostrorumque fidelium presentium scilicet ac futurorum agnoscat unanimitas, quia nos divino afflati instinctu ad honorem et reverentiam tremende ac individue trinitatis sacrosanctum templum in insula, que casa aurea vocitatur, fundari et consumari hylari mente precepimus; ubi et almificum beatissimi pontificis et martyris Clementis corpus venerabiliter recondi fecimus; atque in eodem situ famulorum dei cenobium perpetuis temporibus permanendum augustaliter atque liberaliter instituimus, quatenus coadunato illic sub regulari norma religiosorum virorum cetu altissimo deo laudes iugiter inibi votaque resultent. Qua de causa ad maiorem mercedis nostre cumulum ac loci ipsius necessarium supplementum servorumque Christi in ipso degentium seu illic undecumque adventantium perenne subsidium contulimus in iam dicto sancte trinitatis cenobio omnes res nostras, quas conquisivimus per totam Tusciam a quibusdam hominum — hi sunt Farimundus diaconus et cappellanus simulque Farao et Farulfus filii quondam Farulfi —, videlicet curtem in fundo Hisiano et alia curte in fundo Palme una cum omnibus ad supra scripte curti pertinentes, et quod ipsius Farimundi in parte evenit a suis fratribus, hoc est quinta portione de curte in fundo Pao et curtem in fundo Pantanola et curte in fundo Uenena et curte infra civitate Tuscana cum omnibus ad supra scripta quinta portione pertinentes. Donamus et curtem nostram in Suberella cum omni pertinentia vel adiacentia sua, cum servis et ancillis cartulariis aldionibus libellariis mobilibus et immobilibus, sicut ad nostram tenuimus manum, totum in integrum. Similiter donamus ipsas res, quod Walbertus episcopus nobis per cartulam delegavit in territorio Tuscanense, hoc est curte in fundo Cattiano et curte in Orta cum servis et ancillis, cum mobilibus et immobilibus, cum omni pertinentia earum. Pari etiam modo donamus casas massaritias numero decem, quas Asprandus filius quondam Asprandi nobis per cartulam delegavit, quod sunt posite in finibus castro Tuscana, omnia ad supra scriptas massaritias pertinentes, seu et res in finibus Pistoriensis, quas Guichelmus nobis per cartulam delegavit, cum omnibus ad easdem res pertinentibus. Verum etiam donamus et omnes res, quas nunc habemus in Castro felicitatis et curtem nostram in sancto Cerbonio et curtem nostram in fundo Carpena et Moliano. Nec non et donamus curte nostra in fundo Gorgiano, qui vocatur ad sanctum Heliam, in finibus Aprutiensis, similiter cum servis et ancillis, cum mobilibus et immobilibus, omnia, sicut ad nostram tenuimus manum. Que autem cortes et res superius nominatas seu et, quocumque contractu iuste ac legaliter in nostrum ius dominiumque transfuse sunt, omnes dumtaxat iuris nostre per denominata loca cortes cum servis et ancillis atque aldionibus et omnibus, que in his invente fuerint, rebus ac cunctis appendiciis earum iam dicto summe trinitatis cenobio venerabili presentaliter sollempniterque largimur et per huius nostri precepti imperialem auctoritatem irrefragabiliter stabilimus, ut habeant eas atque possideant fruanturque iure quieto ac pacifico ab hodierno die ac deinceps tam hi, qui presentes sunt, quamque et illi, qui venturi sunt, famuli Christi. Cunctis igitur tam presentibus quam et futuris cognitum sit supra taxatum cenobium habitatoresque ipsius cum universis respicientibus ad ipsum mobilibus et inmobilibus rebus sub nostri mundburdi continuam tuitionem a nobis iam dudum esse receptum, in tantum, ut omnem ipsius tanquam peculiarissime domus nostre causam pro amore superno, quoadusque spiramus, exequi modis omnibus decreverimus. Post nostrum vero ex hac luce vita disscessum illi soli eiusdem venerandi loci tutelam committimus, ad cuius honorificentiam nostro studio constat exstructus. Quapropter cunctos, qui nobis in imperium pro tempore successuri sunt, imperatores, duces ac principes, primates quoque locorum supra dictorum ac iudices per ipsam trinam et unam maiestatem districte obtestamur et terribiliter adiuramus, ut prenominatum sacratissimum colende trinitatis municipium iuxta huius nostri precepti tenorem ratum ac stabilitum, ut semel ordinavimus, esse permittant; nullam contra leges violentiam deminorantiam vel subtractionem seu invasionem neque etiam quamlibet publicam functionem eidem venerandi loco quocumque in tempore inferre presumant. Et si forte reclamaverint, ad quoscumque eorum querela pervenerit, pro dei summi amore omnem illis iustitiam adimplere non differant. Si quis autem huius nostre institutionis et, quod magis est, divine promulgationis sacrilegus contemptor et temerarius violator extiterit, sciat se incursurum iram ipsius sancte et individue trinitatis atque in tremendo iusti iudicis examine causam nobiscum dicturum, ac per hoc cum Iuda proditore ab apostolico agmine cum impiis ac sacrilegis sequestratus pars illius sit in stagno ignis ardentis et sulphuris. Set ut hec nostre liberalitatis ac pie largitionis seu prefixe institutionis pagina perpetuum obtinere valeat roborem, manus eam nostre annotationis sollemniter insignivimus nostreque bulle inpressione subter confirmari iussimus.
Signum manus (M.) domni Ludouuici serenissimi imperatoris.
Giselbertus presbiter et notarius ex iussu imperatoris scripsi et subscripsi.
Data kalendis septembris, indictione VIII; actum Olonna in curte imperiali anno imperii domni Ludouuici serenissimi imperatoris vicesimo quinto deo propitio; feliciter.