In nomine domini dei et salvatoris nostri Iesu Christi. Hludouuicus divina ordinante providentia imperator augustus. Si petitionibus fidelium nostrorum aures nostrae pietatis nostrae accomodaverimus, id nobis ad eorum fidelitatem augendam prodesse cupimus, insuper ab aeterno remuneratore praemia sine fine mansura nos percipere credimus. Igitur omnium fidelium sancte dei ecclesiae nostrorumque praesentium scilicet ac futurorum nosse cupimus sagacitatis industriam, qualiter Angelberga dilectissima coniunx et consors imperii nostri expetivit clementiam nostram, quatinus per nostrae largitionis praeceptum iure proprio concederemus Supponi strenuo vasso dilectoque consiliario nostro quasdam cortes iuris regni nostri sitas in comitatu Parmense in gastaldato Bismantino, quarum una vocatur Fellinas, cum capella et omni domocoltile et mansis atque familiis utriusque sexus omnibusque rebus ad eam pertinentibus tam mobilibus quam immobilibus, et alteram, que nominatur Malliaco, similiter cum omnibus rebus mobilibus et immobilibus tam domocoltilibus quam massaritiis servisque et ancillis, silvaque et gaio in monte Ceruario. Cuius praecibus libenter annuentes iam fato Supponi inclito vasso nostro praenominatas cortes Fellinas et Malliacum cum capella et omnibus rebus mobilibus et immobilibus seseque moventibus cunctisque mansis silvaque et gaio in monte Ceruario seu et familiis utriusque sexus et universis pertinentiis et adiacentiis suis in integrum, sicut hactenus ad partem regni nostri pertinuerunt, per hoc nostrae donationis preceptum ad proprietatem concedimus suisque heredibus ac proheredibus in perpetuum habendas et possidendas cum omnibus, que dici aut nominari possunt, tam in montibus quam in planitiebus, remota totius rei bublice vel alicuius potestatis inquietudine. Si quis autem hoc nostre largitionis preceptum quandoque violare aut irrumpere conatus fuerit, sciat se compositurum centum libras auri obrizi, medietatem palatio nostro et medietatem sepe nominato Supponi eiusque heredibus ac proheredibus. Et ut hoc nostrae donationis preceptum futuris temporibus firmiorem in dei nomine obtineat vigorem, manu propria subter confirmavimus et anuli nostri impressione insigniri iussimus.
Signum domni (M.) Hludouuici serenissimi imperatoris augusti.
Gauginus notarius iussu imperiali recognovi et (SR.) (SI.)
Dat . III non. aprl., anno Christo propitio imperii domni Hludouuici piissimi
augusti XX. indictione XI; actum Uenusia; in dei nomine feliciter amen (NT.: amen,
amen, amen).