In nomine domini nostri Iesu Christi dei aeterni. Hludouuicus divina ordinante providentia imperator augustus. Universorum sanctae dei aeclesiae fidelium tam praesentium quamque et futurorum noverit sollertia nos per hoc nostrae munificentiae imperiale preceptum concessisse ac aeternaliter confirmasse sub perpetua dominatione dilectae coniugi nostrae, clarissimae scilicet augustae Angilbergae, Sextum cortem nostram in comitatu Cremonensi, sed et cortem nostram Leocarni in comitatu Stationensi simulque Aticianum cortem nostram in comitatu Dianensi. Ipsas cortes, Sextum videlicet, Leocarni et Aticianum, cum omnibus appendiciis et pertinentiis earum, cum familia diversi sexus et etatis, cum universis rebus intrinsecus et extrinsecus, tam mobilibus integriter quamque et immobilibus ad easdem cortes respicientibus massariciis aldionariciis libellariis iudiciariis conditionariis vicanalibus alpibus piscariis, ubicumque et quantumcumque ex antiquo earundem dominio consuetudenario more pertinuisse dinoscitur, omnia et in omnibus iam dictae augustae, amabili coniugi nostrae, ex hoc nunc et in posterum mancipamus ac stabilimus iure proprietario habendas tenendas possidendas fruendas ac dominandas; et quicquid exinde elegerit et voluerit sibique placuerit in vita et post mortem, in omnibus perpetuam habeat potestatem faciendi. Si quis vero, quod non credimus, huic nostrae imperiali preceptioni contraire aut in aliquo molestari temptaverit, primitus dei omnipotentis incurrat iram; deinde sancimus, ut componere cogatur centum libras auri probatissimi ei, cui molestari non erubuit; et haec nostra praesens concessio, sicuti constituimus, inviolata permaneat. Unicuique vero nostrorum successorum, qui per tempora fuerint, interdicimus et sub divina invocatione adiuramus et obtestamur, ut nostrae deliberationis facta, ut a nobis edita sunt, ita sinant rata irrefragabiliter sempiternaliterque permanere. Si vero, quod non credimus, nostra irruperint, sentiant in praesenti severitatem aeterni iudicis et in futuro cum Iuda veritatis proditore sempiternam luant combustionem. Et ut pleniorem haec nostra presens donatio atque concessio optineat vigorem veriusque ac firmius ab universis credatur et observetur, manu propria subter eam firmavimus et bullis nostris roborari precepimus.
Signum (M.) domni Hludouuici serenissimi augusti.
Ego Gauginus iussu piissimi augusti domni Hludouuici scripsi et (SR.) (B.D.)
Acta Capua civitate IIII non. iul.; data anno Christo propitio serenissimi augusti
domni Hludouuici XVIII, indictione III; in dei nomine feliciter (NT.: amen).