Datierung: 1181 07 14
Alexander episcopus servus servorum dei. Dilecto filio, Sigehardo laurissamensi abbati, salutem et apostolicam benedictionem. Eos qui in ecclesia dei maiorem locum pro meritis suis obtinere noscuntur, et romanae ecclesiae devotiores existunt, decet nos in suis petitionibus facilius exaudire. Inde est quod venerabilis fratris nostri Cunradi Salzeburgensis archiepiscopi, apostolicae sedis legati, consanguinei tui, precibus inclinati, de apostolicae sedis benignitate usum anuli tibi tuisque successoribus duximus indulgendum. Datum Viterbii, II id. iulii.
Rebus, honestate, successu, nobilitate
Compta per Heinricos, Ottones, et Lodowicos,
A Karolo cepta, quo principe culmen adepta,
Stematis est clari, revera digna vocari
Regia, regalis, locus et thronus imperialis,
Filia romane sedis liberrima plane.