Karl der Grosse verleiht dem von Bischof Guntpert erbauten und ihm geschenkten Kloster Ansbach Immunität und freie Abtswahl.
Datierung: 786 03 29
Ausstellungsort: Aachen (?)
(C.) Karolus gratia dei rex Francorum et Longobardorum ac patricius Romanorum. Si petitionibus sacerdotum vel servorum dei, quod pro eorum quiete vel iuvamine pertinet, libenter obaudimus vel ad effectum in dei nomine mancipamus, regiam consuetudinem exercemus et hoc nobis ad mercedis augmentum vel stabilitatem regni nostri pertinere confidimus. Ideoque notum sit omnium fidelium nostrorum magnitudini, qualiter vir venerabilis Guntbertus episcopus monasterio aliquo in pago Rangouui infra walto qui vocatur Vircunnia rastas quatuor intra duo flumina, quae nuncupantur Rethratenza et Onoldisbach, in loco ubi insimul confluunt, quod ob amorem domini nostri Iesu Christi in honorem sanctae dei genetricis Mariae semperque virginis in sua proprietate a fundamentis suo aedificavit opere, nobis per testamentum donacionis spontanea ac promptissima voluntate pleniter cum omni integritate et soliditate ibidem pertinentia visus est tradidisse vel condonasse, ubi asserit non parvam habere congregationem monachorum sibi subditam, qui sub regula sancti Benedicti Christo domino militare videntur. Idcirco placuit celsitudini nostrae, ut sub integra emunitate ipsum monasterium una cum rebus et hominibus ibidem aspicientibus seu pertinentibus pro mercedis nostrae augmento maneret inconvulsum. Praecipientes ergo iubemus, ut nullus iudex publicus infra memorato monasterio sanctae Mariae ac nostro seu curtibus ac rebus vel agris sive locis ibidem aspicientibus vel pertinentibus ad causas audiendum nec freda exigendum aut fideiussores tollendum nec mansiones vel paratas faciendum nec inferendas aut pensiones exactandum nec homines ipsius distringendum nullo umquam tempore ingredere iudiciaria potestas aut penitus exactare praesumatur, sed in aelymosina nostra ad iam dictum locum sanctum in luminaribus ecclesiae perenniter proficiat in augmentis. Et specialiter concessimus praefato venerabili viro Guntberto episcopo, ut, quando quidem ipse de hac luce ad dominum migraverit, si ipsi monachi condigne ac secundum ordinem sancti Benedicti infra ipso monasterio vitam duxerint, qualem digniorem ac meliorem nobisque per omnia fidelem inter se eligere voluerint rectorem, ex permisso ac voluntate seu nostra iussione haeredumque nostrorum per hanc nostram auctoritatem atque confirmationem licentiam habeant eligendi abbatem. Et ut melius delectet ipsos servos dei pro stabilitate regni nostri ac procerum nostrorum domini misericordiam attentius exorare et quieto ordine vivere vel residere, manu propria infra roborare decrevimus et de anulo nostro sigillare praecepimus.
Signum (M.) Karoli gloriosissimi regis.
Ercenbaldus advicem Radoni recognovi.
Data IIII kal. aprilis anno XVIII et XIIII regni nostri; actum Aquisgrani palatio nostro; in dei nomine feliciter amen.