Karl der Grosse nimmt das Kloster St. Calais in seinen Schutz und bestätigt die Immunität.
Datierung: 711 07
Ausstellungsort: Valenciennes
Karolus gratia dei rex Francorum vir illuster omnibus agentibus nostris tam praesentibus quam et futuris iuvante domino, qui nos in solium regni instituit. Si petitionibus servorum vel monachorum domini, quod pro eorum quietem vel iuvamen pertinet, libenter obaudimus vel ad effectum in domini nomen mancipamus, regiam consuetudinem exercemus et nobis ad laudem vel stabilitate regni nostri in domini nomen pertinere confidimus. Ideoque venerabilis vir Rabigaudus abba de monasterio Anisola, qui est in pago Cenomannico constructus, ubi sanctus Karilefus in corpore requiescit vel ipse abba cum congregatione monachorum sub sancto ordine conversare videtur, missa petitione clementiae regni nostri expetiit, ut eum vel ipsum monasterium una cum omnibus rebus vel homines suos, quod praesenti tempore habere videtur aut inantea a deo timentibus hominibus fuerint collata aut condonata, amicis gasindis susceptis vel quid per ipsum monasterium sperare videntur, unde legitimo redebit mitio, sub sermone tuitionis nostrae vel immunitatis ipsius monasterii vel mundeburdo filii nostri Karoli [recipere deberemus], qui causas ipsius abbatis vel monasterii sui habet in tuitione receptas; cui nos hoc gratanti animo praestitisse vel in omnibus recepisse cognoscite. Quapropter per praesentem decrevimus ac iubemus praeceptum, ut neque vos neque iuniores successoresque vestri nec missi de palatio nostro discurrentes, ut inspecta ipsa priorum regum auctoritas declarat, nec ullus quislibet de iudiciaria potestate in vicos aut in villas ipsius monasterii ad causas audiendum nec ulla inferenda exactanda vel freda exigenda nec fideiussores tollendos nec mansiones aut paratas faciendas nullus episcopus nec ullus comes nec iuniores eorum nullas redibutiones ad requirendum ibidem ingredere non praesumant, sed sicut ipsum beneficium antecessorum regum ad iam dictum monasterium usque nunc fuit conservatum, ita deinceps per nostram auctoritatem generaliter maneat inconvulsum, nisi [ut] liceat eis sub sermone tuitionis nostrae vel immunitatis nostrae et mundeburdo praedicto filio nostro valeat quiete vivere ac residere et die noctuque pro nobis vel [stabilitate] regni nostri vel pro memorato filio nostro Karolo, qui eorum causas habet receptas, iugiter domini misericordiam et omnium sanctorum deprecare. Et si tales causae adversus ipsum monasterium aut contra abbates monasterii supradicti ortae fuerint aut surrexerint, quas a vobis aut a iunioribus vestris absque eorum iniquo dispendio terminatae non fuerint, usque in nostram praesentiam vel ante filium nostrum Karolum omnimodis reserventur et ibidem finitiva sententia per legem et iustitiam debeant accipere et unicuique de reputatis conditionibus iustitiam reddant et ab aliis simili modo veritatem recipiant. Et ut haec auctoritas firmior sit vel per tempora melius observetur, manus nostrae subter signaculis decrevimus roborare.
Signum Karoli gloriosissimi regis.Idherus recognovi.Data mense iulio anno; actum Valentianas; feliciter.