Urkundenbuch des Klosters Fulda; Teil: Bd. 1., (Die Zeit der Äbte Sturmi und Baugulf) (Ed. Stengel) Nr. 244
Datierung: 796 08 30
In nomine dei patris et filii et spiritus sancti. Licet parva et exigua sint, quae pro inmensis peccatis meis et debitis offero, tamen pius inspector dominus noster Iesus Christus non quantitatem muneris sed devotionem pensat mentis et non quantum sed ex quanto in illius conferatur sacrificium. Idcirco ego Griuzing dono atque trado in elimosinam meam ad monasterium, quod dicitur Fulda, ubi sanctus martyr Bonifatius corpore requiescit et ubi vir benignus Paugolf turbae monachorum praeesse videtur abbas, in pago Grapfelde et in villa Marchereshusom - quicquid proprietatis habere videor, hoc est quatuor hobas in silvis, in campis, in pratis, in pascuis, in aquis, in aquarum decursibus, in molinariis, in aedificiis, in mancipiis, quorum nomina haec sunt: Ruadmunt et servus eius, Theotbirg, Ecca, Hruadalah, Hitta, Hruadolf, Hruadgoz, Tunta, Cunimunt cum omni supellectili eorum et, sicut superius dictum est, totum et integrum per hanc kartulam traditionis quicquid in supradicta villa proprietatis habeo, trado ad sanctum Bonifatium, ut per illius patrocinium apud piissimum iudicem veniam consequi meorum merear delictorum, ea scilicet ratione, ut ego illud incontradictum ab omni homine habeam ad vitam meam. Post obitum vero meum vos et successores vestri eorum, quae in supradicta villa tradidi, sive in mobilibus sive in inmobilibus, quicquid dici et nominari potest, nullo contradicente firmissimam in omnibus habeatis potestatem. Nec non et ego in aliis duabus villulis duas tradidi hobas, in Guogileibu et in Eigesleibu. Illas a tempore traditionis in vestra firmiter stare volo potestate. Acta haec traditionis kartula sub die tertiae kl. septembris anno XXVIII. regnante Carolo gloriosissimo rege Francorum.