Datierung: [721–722]
Ausstellungsort: Rindern
In Dei nomine. Ego Ebroinus comes, filius Oda quondam, donator, aliquid de rebus meis ad loca sanctorum pro remedio animae meae seu dilectissimae coniugis meae Theodelindae dare disposui; hoc est, ad basilicam beati Petri et apostolorum principis seu Iohannis Baptiste vel ceterorum sanctorum, que constructa est in loco Rinharim, in pago Dublensi, super fluvio Rheno, ubi nunc domnus pater et pontifex Willibrordus episcopus custos esse videtur, dono in loco Nitro, villa nostra, casatos tres cum uxoribus et infantibus, terras cum sala et curticle meo vel adiacentia et ad eundem locum pertinentia; et portionem meam in loco Haemmi, silvam iuris mei, totum et ad integrum dono; sed et hoc quod michi legibus provenit in Dangaesbroch, medietatem silvae ad eundem locum pertinentem iure meo; et in villa nostra Meri casatum cum uxore et infantibus et portione silvae; et in villa nostra Rinhari casatos IIII cum uxoribus et infantibus, cum terris et peculiari eorum et porciones de silva. Et in villa nostra Millingi basilicam domnae nostrae Mariae cum omni integritate, quam ibidem ordinavimus, ad eundem sanctum Petrum subrogari volumus et decrevimus; et servum nostrum Folcharium ibidem servientem cum uxore et infantibus, Eodfrid cum uxore et infantibus et terris; et in loco Meginun Walamunt cum uxore et infantibus cum terris: duas hobinnas; et in villa Dagaesburge Oda cum uxore et infantibus et peculiari suo. Haec omnia cum integritate, id est tam casis quam curticlis, campis, pratis, pascuis, silvis, aquis aquarumque decursibus, re mobili et immobili, re exquisita et inexquisita vel reliqua oportunitate ibidem aspiciente, ad supradictum locum sanctum dono donatumque esse perhennis temporibus volo, pro orationum lucro vel missarum sollempniis celebrandis perpetualiter pro me et pro meis. Et ipse locus sanctus et custodes eius hoc habeant, teneant et possideant ac defendant, et quicquid exinde facere voluerint, liberam ac firmissimam in omnibus postestatem habeant. Si quis vero, quod futurum esse non credo, – et reliqua ut supra. Post maledictionem et excommunicationem: auri libras X, argenti pondo XX una cum socio fisco exsolvat. Actum publice Rinharos. Anno I regni Theoderici domni nostri gloriosissimi regis. Ego Ebroinus hoc testamentum a me factum relegi et propria manu firmavi. Ego Virgilius indignus presbiter rogante Ebroino comite in Dei nomine scripsi et subscripsi. Guntberechtus. Folchbrectus. Godobrectus. Raedbrectus. Redualdo. Herifuso.