Notum sit tam praesentibus quam futuris quod ego Herveus, Majoris Monasterii humilis minister, per communem capituli nostri assensum, concessimus Bodino de la Vauzella et Girardo fratri ejus domum nostram de Ver, quoad vixerint habendam cum pertinentiis suis et tenendam, sub tali conditione ut ipsi simul eamdem domum habeant et teneant. Quam domum ab omni debito liberam tenebunt et terras ipsius domus, prout expedierit, colent, domos destruetas reaedificabunt, monacho uni ibidem juxta honestam ecclesiae nostrae consuetudinem necessaria providebunt, bonum quoque hospitalitatis nobis et claustralibus hujus nostri monasterii exhibebunt, singulis etiam annis de eadem domo LX. solidos Andegavenses his terminis nobis persolvent: in festo aestivali B. Martini XXX. solidos, in hiemali XXX; sacristae etiam II. solidos reddent et armario XII. denarios. Nos autem praedictos clericos in fratres recepimus, et ipsi se nobis condonaverunt: ut si forte ad religionem transire voluerint, non alibi quam ad nos habitum religionis assument. Sciendum praeterea est quod, quando alter eorum decesserit, de omnibus mobilibus quae eum proprie contingent medietatem, sine alicujus contradictione vel reclamatione, habebimus. Superstes vero, sub praedictae conventionis tenore, praefatam domum quoad vixerit tenebit; cum autem et ipse decesserit, modo quo praedictum est, de omnibus mobilibus ejus medietatem libere habebimus. Terras etiam ipsius domus et quae ad agriculturam ejus pertinent, in eo statu in quo tempore illius secundi decedentis fuerint, integre habebimus. Hoc se bona fide et sine fraude tenendos juraverunt praedicti fratres. Quod ut ratum sit, praesentes litteras sigilli nostri impressione communiri fecimus, anno verbi incarnati MCLXXXVIo, in festo hiemali (sancti Martini).