Gaufridus, abbas Sancti Albini, et magister P. Fortis, decanus inter Sartam et Meduanam, omnibus ad quos etc. etc. .... Noveritis quamdam controversiam coram nobis, auctoritate apostolica, fuisse agitatam inter priorem et monachos de Monte Johannis, ex una parte, et Guischardum Charpi militem, ex altera, super cenagio et primiciis piscium exclusae de Leone; quae coram nobis terminata est in hunc modum. Consideratis quidem authenticis abbatiae Majoris Monasterii, evidenter perpendimus dictum Guischardum habere tantummodo annuatim, per duos dies veneris quadragesimae, cenagium in illa exclusa; videlicet una die veneris ante mediam quadragesimam, et alia die veneris post mediam quadragesimam Et adjudicavimus quod praefatus miles et successores ejus his diebus essent contenti, super aliis tam ei quam successoribus suis perpetuum silentium imponentes. Ad majorem autem hujus rei firmitatem, praesentes litteras testimoniales, sigillorum nostrorum munimine confirmatas, abbatiae Majoris Monasterii et priori et monachis de Monte Johannis duximus concedendas.