Mauricius, Dei gratia Nannetensis episcopus, universis sanctae Matris ecclesiae filiis tam praesentibus quam futuris, in perpetuum. Noverit universitas tam praesentium quam futurorum quod nos, supernae remunerationis intuitu et ob reverentiam beati Martini et ordinis ac religionis Majoris Monasterii, concessimus dilectis in Christo fratribus Gaufrido abbati et monachis Majoris Monasterii capellam S. Petri de Castro Celso, et ut in ea monachi praedicti Monasterii certam habeant mansionem ibique sub regulari disciplina Deo debeant de servire: confirmantes insuper eis ac sigilli nostri munimine roborantes quidquid eis nobilis vir Gaufridus Crispini, dominus ejusdem castri, intuitu contulit pietatis vel in posterum ipse seu alii Dei fidelium, pro animarum suarum remedio erogabunt, nostro et parrochiali jure in omnibus salvo. His testibus: magistro P. decano, magistro Tebaudo, Ogerio canonicis Nannetensibus; Bernardo la Pucella, Evone priore Sanctae Crucis, monachis Majoris Monasterii; Gaufrido Crispini, Tebaudo Crispini et W. Crispini et multis aliis.