Eugenius episcopus, servus servorum Dei, dilectis filiis Garnerio abbati Majoris Monasterii ejusque fratribus, salutem et apostolicam benedictionem. Oportet nos, ex apostolicae sedis administratione, pro ecclesiarum statu satagere et rerum quieti et utilitati salubriter, auxiliante domino, providere. Proinde, dilecti in domino filii, vestris justis postulationibus gratum impertientes assensum, ecclesiam de Culcherio et ecclesiam de Nucareio, quemadmodum a venerabili fratre nostro Gaufrido Carnotensi episcopo vobis rationabiliter concessae sunt, praeterea quidquid habetis in ecclesia Beati Leonardi de Chimiliaco, sicut per concessionem episcoporum et confirmationem venerabilis fratris nostri Brunonis bonae memoriae Segniensis episcopi, tunc apostolicae sedis legati, rationabiliter habetis et possidetis, auctoritate vobis apostolica confirmamus et rata manere decernimus. Et quoniam praefata ecclesia Sancti Leonardi in parrochia vestra sita est et sub censu vobis annualiter persolvendo in vestra subjectione consistit, prohibemus ut consecrationem vel benedictionem aliquam, baptisterium sive cimiterium absque assensu vestro nullus facere inea praesumat. In praefatis vero ecclesiis de Culcherio et Nucareio, juxta rationabilem et antiquam consuetudinem quam in aliis vestris ecclesiis habetis, sacerdotum ordinationes vobis facere liceat Datum Lateranis, IVo nonas Januarii.