Multipliciter multiplex misericordia Dei perplurimum voluit honorari genus humamum, dum cuique mortali largiri dignatur, ut ex temporalibus rebus coelestia regna mercari valeat et de transitoriis sempiterna percipere, dicente ipso domino per angelicam vocem: fiducia magna erit coram summo Deo elemosina omnibus facientibus eam; et in evangelio: quicumque dederit calicem aquae frigidae, tantum in nomine meo, non perdet mercedem suam. Quocirca, in nomine summi salvatoris Dei, ego quidem Fulco Dei nutu Andecavorum comes, misericordiam Dei devota mente considerans modumque fragilitatis humanae adtendens ac pavens utrumque diem judicii, dono donatumque esse in perpetuum volo sancto Martino Majoris Monasterii sive monachis ejusdem loci, quibus praeesse videtur domnus ac venerabilis abbas Guillebertus, tam pro deprecatione domni Tetbaldi monachi consanguinei mei quam pro remedio animae genitoris mei Gaufridi atque genitricis meae Adelae seu animae meae atque Helisabet uxoris meae, et ut Deus omnipotens, per intercessionem piissimi confessoris Martini, nobis filios tribuat qui post nos haereditari possint, vel parentum meorum, omnes pisces juris mei pertinentes ex piscaria Balei, sita in pago Andegavensi, exceptis luciis. Reliquos vero pisces quos in eodem lacu homo piscari poterit a praesente die cedo, trado atque transfundo: ita ut quidquid ab hodierna die et deinceps monachi Majoris Monasterii de praefatis piscibus facere voluerint, liberam et firmissimam in omnibus potestatem habeant faciendi, eo scilicet tenore ut quotidie ipsi monachi psalmum unum cantent et unaquaque hebdomada unam missam pro Fulcone atque uxore ejus atque supradictis. Si quis autem hanc meam devotissimam ac pronam oblationem ex haeredibus ac pro haeredibus meis seu aliunde aliqua intromissa persona refringere aut resultare tentaverit, in primis sanctum confessorem Christi Martinum offensum graviter sentiat et cum diabolo in tormentis inferni damnetur, nisi citissime a sua malivola voluntate reversus fuerit. Insuper etiam partibus ipsius ecclesiae auri libras XXX. coactus exsolvat et sua repetitio nullum effectum habeat; sed haec donatio, a me signo sanctae crucis aliorumque virorum bonorum manibus roborata, firma ac stabilis omni tempore firmiter valeat permanere. Signum Fulconis comitis. S. Gaufridi, S. Hernoldi clerici, S. Alberici, S. Marcuardi, S. Gauslini, praepositi, S. Hamoni, S. Gauslini, S. Fulconis, S. Hatoni, S. Herneisi, S. Ulgerii, S. Gauscelini, S. Warini, S. Cadeloni. Data in mense octobris in civitate Andecava, publice, anno IIIo regnante Hugone rege.