König Arnolf gibt dem Grafen Ulrich seine eingezogenen Besitzungen in Alamannien und dem Elsass zurück, mit Ausnahme von Teufen.
Datierung: 890
Ausstellungsort: Regensburg
† In nomine sanctae et individuae trinitatis Arnolfus divina favente clementia rex. Noverit omnium fidelium nostrorum, praesentium scilicet ac futurorum industria, qualiter nos quorumdam fidelium nostrorum relatu comperientes Odalricum una cum Perehtheda uxore sua pravo consultu contra regalem maiestatem nostram deliquisse, omnes res proprietatis suae, quas in Alamannia vel Alisatia habere visi sunt, in quibuscumque pagis vel finibus consistentes, legali conditione publicandas censuimus et in regiam potestatem redigere precepimus et eas Haddoni dilecto abbati nostro in beneficium concessimus. Postea quoque idem venerabilis fidelis abba noster aures serenitatis nostrae precatus est, quatenus supradictas res praelibato Odalrico uxorique suae denuo in proprium concederemus. Cuius petitionem misericordia moti pro Dei amore et suo honore libenter implevimus omnesque res ante recensitas proprietatis eorum in nostram dicionem redactas eis ex integro, excepto uno loco Tiuffen nominato, in perpetuam proprietatem donavimus. Et iussimus inde hoc nostrae auctoritatis preceptum conscribi, per quod decernimus atque firmissime iubemus, ut ipsi inde ab hodierna die et deinceps securam atque liberrimam teneant potestatem habendi, donandi, vendendi, commutandi aut quicquid exinde voluerint et disposuerint facere, sine alicuius personae obstaculo. Et ut haec auctoritas nostra firmior habeatur veriusque credatur et diligentius observetur, manu propria eam firmavimus anulique nostri impressione subtus assignari praecepimus. Signum domni Arnolfi M invictissimi regis. Aspertus cancellarius ad vicem Deotmari archicappellani recognovi et subscripsi. Data .... anno incarnationis DCCCXC, indictione VIII, anno III regni Arnolfi piissimi regis. Actum Regino civitate in Dei nomine feliciter. Amen.