König Arnulf schenkt seinem Kaplan Liutbrand das Klösterlein Faurndau und die Kapelle Brenz, um sie nach Belieben dem Kloster Sanct Gallen oder Reichenau zu übergeben.
Datierung: 888 02 11
Ausstellungsort: Regensburg
† In nomine sanctae et individuae trinitatis Arnulfus divina favente gratia rex. Si petitionibus procerum fideliumque nostrorum aures serenitatis nostrae accommodamus et his, qui ab infantia in servitio christianissimi avi nostri Hludowici et filiorum eius gloriosissimorum regum antecessorum nostrorum immoque in nostra fidelitate pio anhelebant studio, de temporali regno nostro aliquid in proprium donare studuerimus, praemia vitae aeternae inde nobis provenire liquido confidimus. Quapropter omnium fidelium nostrorum, praesentium scilicet et futurorum cognoscat prudentia, qualiter nos Liutbrando cuidam venerabili cappellano nostro ob assiduum et fidele servitium suum, quod beatissimo avo nostro Hludowico, filiis illius gloriosissimis regibus antecessoribus nostris et nobis assidue indefessa fide devote peregit, monasteriolum, quod dicitur Furuntauva, et cappellam illam ad Brenza cum omnibus appenditiis eorum, mobilibus vel inmobilibus, per hoc praesens auctoritatis nostrae praeceptum totum ex integro concessimus in proprium, ut ab hodierna die et deinceps ipse potestatem habeat per istos auctoritatis nostrae apices, ea omnia ad monasterium sancti Galli confessoris Christi vel ad monasterium Augia, prout sibi placuerit, tradere possit, sibi inde conplacitare, quanto melius potuerit, in elemosina vel remedio animarum piissimi avi nostri Hludowici et Hemmae filiorumque vel filiarum ipsorum in Christo quiescentium necnon et pro nostra suaque aeterna remuneratione absque contradictione ullius personae. Et ut hoc nostrae auctoritatis praeceptum verius credatur et per futura tempora ab omnibus fidelibus nostris diligentius conservetur, manu propria nostra confirmavimus et sigilli nostri inpressione subter hoc assignari iussimus. Signum domni Arnulfi M invictissimi regis. Asbertus cancellarius ad vicem Theotmari archicappellani recognovi et subscripsi. Data III id. febr., anno dominicae incarnationis DCCCLXXXVIII, indictione VI, anno autem I regni domni Arnulfi serenissimi regis. Actum Reganesburc in Christi nomine feliciter. Amen.