Cotefrit und Hungund übertragen ihren Besitz zu Reginbrehtiswilare an Sanct Gallen.
Datierung: 868 05 05
Ausstellungsort: Frauenzell
In Christi nomine Ego Cotefrit et filia mea Hungund cum manu advocati nostri Paldingi et filii Hungundae Kisilharii tradimus ad monasterium sancti Galli, cui modo venerabilis abba Grimaldus preesse dinoscitur, quicquid in Reginbrehtiswilare habere ac possidere videmur ea scilicet ratione, ut nos ipsas easdem res ad nos recipientes censum exinde annis singulis persolvamus, id est VI denarios sive in alia quacumque re VI denariorum valente. Et hic census ad missam sancti Martini confessoris Christi in Ratpotiscella reddatur; hoc etiam addito, ut nos et legitima nostra procreatio, sive masculi seu feminae sint, in supradicto censu prefatas res eternaliter possideamus. Sed et hoc commemorare volumus, ut nos et posteri nostri familiaritatem ad rectores prefati monasterii et ad familias eorum habeamus, et ut mundiburdium ad eos habere possimus, et illorum res, id est pascuas, silvas aliaque nobis necessaria inter eos fruendi facultatem habeamus. Haec omnia, ut supra memoravimus, volumus ut sine ullius contradictione perpetualiter permaneant Si quis vero, quod fieri non credo, aut nos ipsae aut aliqua opposita persona hanc traditionis cartulam irrumpere conaverit, irrita sit eius machinatio et ad aerarium regis auri uncias III et argenti pondera V coactus persolvat Hec autem traditionis carta immobilis persistat cum stipulatione subnexa Actum in loco, qui dicitur Ratpotiscella publice, presentibus istis, quorum hic signa notantur Signum Cotefritae et Hungundae et Kisilharii filii eius advocatique eorum Paldingi, qui hanc traditionis cartulam fieri voluerunt. Engilhelm. † Nandker. † Kisilolt. † Ehso. † Altman. † Reginher. † Rapold. † Alberic. † Ouvo. † Uato. † Tagabert. † Folcholt. Ego itaque Liuto monachus et diaconus in vicem Ricperti prepositi scripsi et subscripsi Notavi diem mercoris, VIII id. mai annum XXVIIII Hludowici regis, comitem Waningum.