Le roi Otton III prend sous sa protection les monastères de Stavelot et de Malmedy et accorde aux religieux la libre élection de leur abbé commun.
Datierung: 987 02 27
Ausstellungsort: Nimègue
In nomine sanctae et individuae Trinitatis, Otto divina favente clementia rex. Si piis peticionibus sacerdotum de nostra regia munificentia aliquid accommodaverimus, id ad aeternae retributionis munera capessenda profuturum nobis liquido credimus. Quapropter omnium fidelium nostrorum tam praesentium quam et futurorum dinoscat industria, quomodo vir venerabilis Rauengerus Stabulensis et Malmundrensis monasterii abbas nostris optutibus praesentavit praecepta beatae memoriae avi nostri Ottonis et aequivoci illius genitoris nostri imperatorum augustorum, in quibus continebatur qualiter ipsi praelibata coenobia Malmundrense et Stabulacense et omnia loca illuc aspicientia omnemque familiam servilem et ingenuam illo pertinentem sub suae tuitionis immunitatem susciperent, eorumque praeceptionibus praedecessorum suorum morem sequentes confirmarent. Pro rei tamen firmitate petiit celsitudinem nostram ut nos denuo id ipsum faceremus. Cujus peticionem, ob votum dilectae genitricis nostrae Theophanu videlicet imperatricis augustae necnon et interventum fidelis nostri Hildeboldi Uuormaciensis ecclesiae venerabilis episcopi atque Nothgeri Leodicensis episcopi, benigne suscipientes, antefata coenobia Stabulense et M almundrense que sanctus Remaclus confessor Christi in honore sancti Petri principis apostolorum construxit et consecravit, quibus modo praesidet praedictus Rauengerus, cum omnibus ad victualia vel stipendia monachorum sub regula sancti Benedicti Deo sanctoque Remaclo die nocteque ibi servientium deputatis, sub nostram tuitionem suscipimus atque sub perpetua nostrae regiae defensionis emunitate esse decernimus, interdicentes firmiter ut nullis umquam temporibus alicui in beneficium concedantur, sed sub nostra nostrorumque successorum tuitione jam dicta coenobia cum ecclesiis ac decimationibus et mansis vel mancipiis omnibusque aliis appenditiis illuc rite pertinentibus perpetualiter consistant. Ad haec etiam monachis Deo et sancto Remaclo in praescriptis coenobiis famulantibus eligendi inter se abbatem quotiens usus evenerit juxta regulam sancti Benedicti liberam potestatem concedimus. Et ut hoc, auctoritatis nostrae praeceptum firmum et stabile permaneat, hanc cartam conscribi et anuli nostri impressione signari jussimus, quam et manu propria subtus firmavimus.
Signum domni Ottonis gloriosissimi regis. (L . M.)
Hildeboldus episcopus et cancellarius vice Uuilligisi archicapellani recognovi.
Data III kal. martii, anno dominice incarnationis DCCCCLXXXVII°, indictione XV, anno autem tercii Ottonis regnantis quarto. Actum Niumago feliciter. Amen.