Datierung: 1178 07 13
Ausstellungsort: Lateran
ALEXANDER episcopus seruus seruorum Dei. Venerabili fratri B. Turon(ensi) archiepiscopo, apostolice sedis legato, salutem et apostolicam benedictionem. Mota iam pridem questione inter bone memorie I(oscium) predecessorem tuum et canonicos beati Martini Turon(ensis) et Rogerium abbatem Cormariacen(sem) super subiectione et obediencia, quam idem predecessor tuus a predicto abbate sibi conquerebatur iniuste subtractam, accesserunt partes ad presentiam nostram et, cum non possemus cause debitum finem imponere, eam uenerabilibus fratribus nostris Trecen(si) et Claromonten(si) episcopis duximus committendam. Cum autem coram Claromonten(si) de assensu Trecen(sis) episcopi partes propter hoc constitute fuissent, eodem Claromonten(si) et uiris aliis honestis et discretis, qui sibi assidebant, mediantibus inter te et Sulpitium successorem predicti abbatis et decanum et canonicos sancti Martini de libero et spontaneo assensu partium amicabilis facta est compositio et in autentico scripto redacta, sicut ex eodem scripto manifeste comparet. Nos autem questionem sopitam nolentes indebite suscitari, qui tenemur litibus finem imponere, compositionem ipsam, sicut de assensu partium in presentia predicti Claromonten(sis) facta est et hinc inde recepta et hactenus obseruata et in scripto autentico ipsius episcopi continetur, ratam habemus et firmam eamque auctoritate apostolica confirmantes presentis scripti patrocinio communimus. Statuentes, ut nulli omnino hominum etc. Si quis autem etc. Dat. Lat. IIIo idus iulii.