Datierung: 1152 04 12
Ausstellungsort: Segni
Eugenius episcopus seruus seruorum Dei. Dilectis filiis Petro abbati de Buxeria eiusque fratribus tam praesentibus quam futuris regularem uitam professis in perpetuum. Quotiens illud a nobis petitur, quod religioni et honestati conuenire dinoscitur, animo nos decet libenti concedere et petentium desideriis congruum impertiri suffragium. Eapropter, dilecti in domino filii, uestris iustis postulationibus benigno concurrentes assensu praefatam ecclesiam, in qua diuino mancipati estis obsequio, sub beati Petri et nostra protectione suscipimus et praesentis scripti patrocinio communimus. Statuentes, ut quascumque possessiones, quaecumque bona eadem ecclesia in praesentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis praestante domino poterit adipisci, firma uobis uestrisque successoribus et illibata permaneant. In quibus haec propriis duximus exprimenda uocabulis: Bordagium Fulcredi, mansuram Adelinae, Bast de Fay, uallem de Broilo sancti Ioannis, pratum, quod est inter Bu(m)paiuen et maiorem aquam, terram, quae est inter Ueterem Calcheiam et terram Willelmy de Cleers, uia Comunani et uinearia apud Nouillam, Frocum Herscant, feudum Gunterii de Diccio excepta medietate nemoris Goin et uineam eiusdem Gunterii de Fay, medietatem prati de Paiuen, terram, quam dedit uobis praefatus Vuillelmus de Cleers et medietatem nucum eiusdem terrae, Broillum sancti Ioannis, pasnagium porcis uestris, inuentiones apum, ligna ad focum et edificia uestra in omnibus nemoribus Nigelli de Doon, quo etiam Nigello, Iuliana uxore, Guidone ac caeteris filiis ac filiabus, Cacamo et Iodoino fratribus eius necnon nobilis memoriae Gaufrido Andegauensi comite ipsorum domino consentientibus omnia, quae praedicta sunt, ad uestram ecclesiam deuenerunt, mansuram terrae, quam Radulphus Golafra cum uxoris et filii sui Humberti consensu pia deuotione concessit, terram, quam dedit uobis Ogerius Tisone et Humberto dominis eius consentientibus, tria arpenta terrae et quartam partem unius, quae Legart relicta Saraceni filiis suis consentientibus uobis pro animae suae redemptione concessit, tria arpenta terrae et duo arpenta prati, quae Bartholomaeus de Vindocino Iosberto genero et filia eius consentientibus ecclesiae uestrae concessit, medietatem unius arpenti de terra, quam Hugo Harberam uobis donauit Urso fratre suo consentiente, duo arpenta terrae, quae Paganus Flandrinae cum Odonis fratris et Ursi auunculi sui consensu pia uobis deuotione concessit, quatuor arpenta terrae, quae dedit uobis Mathaeus uxore ipsius et filiis Humberti Golafra conniuentibus, medietatem unius arpenti de terra, quam Rolandus de Molinis ecclesiae uestrae concessit, duo arpenta terrae, quae dedit uobis Philippus de Salmesio, terram, quam dedit uobis Gonterius de Monte de Chauenis cum uxoris suae consensu, ex dono nobilis memoriae Fulconis comitis et Eremburge uxoris et Gaufridi filii sui, quod fecerunt Sauiniensi ecclesiae ac Sauiniensis ecclesia uobis, terram Randinaium a tumba peregrini usque ad fontem Cortru et, sicut diuidit riuulus Roillius, usque ad terram Roberti Buliant et item a tumba peregrini per Cormaium usque ad aquam de Lunnaca, altera uero parte aque ad prata facienda usque ad plexeium Hugonis de Campis Lamberti et a Campis Lamberti usque ad terram Roberti Buliant, ex dono Raginaldi Rufi terram Moruchum cum appenditiis suis uxore ac filiis suis consentientibus necnon medietatem decimae molendinorum guorum apud Saponariam, ex dono Guidonis Torpin terram de Esserri cum appenditiis suis, ex dono Roberti de Monaia terram de Buxeio, ex dono Heruei de Marches terram apud Fontinellas, unam domum et unum arpentum ac dimidium uinearum, quae Gaufridus clericus pia uobis deuotione concessit, unum arpentum et dimidium uineae, quam dedit uobis Radulphus Artuis, et quatuor mansuras terrae in sylua Coloniae, quas dederunt uobis canonici sancti Martini Turonensis sub annuo censu uiginti solidorum Andegauensis monetae ipsis ipsorumque successoribus ab ecclesia uestra in perpetuum persoluendo, praeterea terram, quam bonae memoriae Petronilla quondam abbatissa Fontis Ebraldi cum sui capituli conniuentia in perpetuum uobis sub annuo censu duodecim denariorum praedictae monetae concessit. Sane laborum uestrorum, quos propriis manibus aut sumptibus colitis, siue de nutrimentis uestrorum animalium nullus omnino a uobis decimas praesumat exigere. Decernimus ergo, ut nulli omnino hominum liceat praefatam ecclesiam temere perturbare aut eius possessiones auferre uel ablatas retinere, minuere seu aliquibus uexationibus fatigare, sed inconcussa omnia et integra conseruentur eorum, pro quorum gubernatione ac sustentatione concessa sunt, usibus omnimodis profutura. Si qua igitur in futurum ecclesiastica secularisue persona hanc nostrae constitutionis paginam sciens contra eam temere uenire tentauerit, secundo tertioue commonita, nisi presumptionem suam congrua satisfactione correxerit, potestatis honorisque sui dignitate careat et a sacratissimo corpore ac sanguine Dei et domini redemptoris nostri Iesu Christi aliena fiat atque in extremo examine diuinae ultioni subiaceat. Cunctis autem eidem loco sua iura seruantibus sit pax domini nostri Iesu Christi, quatenus et hic fructum bonae actionis percipiant et apud districtum iudicem praemia aeternae pacis inueniant. Amen. Amen.
R. Ego Eugenius catholicae ecclesiae episcopus ss.
Ego Ymarus Tusculan(us) episcopus ss.
Ego Hugo Hostiensis episcopus ss.
Ego Hubaldus presb. card. tit. sanctae Praxedis ss.
Ego Bernardus presb. card. tit. sancti Clementis ss.
Ego Octauianus presb. card. tit. sanctae Caeciliae ss.
Ego Gerardus presb. card. tit. sancti Stephani in Celio monte ss.
Ego Centius presb. card. tit. in Lucina ss.
Ego Henricus presb. card. tit. sanctorum Nerei et Achillaei ss.
Ego Otto diac. card. sancti Georgii ad uelum aureum ss.
Ego Rodulphus diac. card. sanctae Luciae in Septasolis ss.
Dat. Signie per manum Bosonis sanctae Romanae ecclesiae scriptoris II idus aprilis, indictione decima quinta, incarnationis dominicae anno Mo. Co. Lo.IIo, pontificatus uero domini Eugenii papae III anno octauo.