Datierung: Sommer 1078
G. episcopus seruus seruorum Dei. R. Turonensium uenerabili archiepiscopo salutem et apostolicam benedictionem. Specialem quandam fiduciam, frater dilecte, mater tua sancta Romana aecclesia in fraternitate tua habere promeruit, quippe quam affabiliter et quanta dilectione, cum ad se uenisti, te susceperit, quam paterne te correxerit, potest et debet prudentia tua recordari, immo hec sic fixa et sic detecta, ut euelli et caligari nullo modo possint, ante oculos cordis semper habere. Ac ideo decet te, ut fructum debitae reuerentiae in omnibus, quibus tuo auxilio indiguerit, sibi prudenter et ex fide exhibeas, ut talium fructuum flagranti odore mater tua intellegat, qua dilectione sibi adhaereas. Recordari debes et uales, frater, cum a nobis recesseris, nos iam ad partes tuas legatos destinasse, quorum unum fore domnum abbatem Cluniacensem, nisi necessarium obstaculum impediret, disposueramus. Uerum longe aliter euenit quam excogitaueramus, et multorum hereticorum heresis sole clarius detecta mutare sententiam super legatis extorsit. Unde nobis uisum est domnum Hugonem Diensem episcopum ac Hubertum sanctae Romanae aecclesiae subdiaconum et nostrum dilectum filium, cum his quoque domnum Wicardum Bisontiensem clericum ad partes tuas mittere et uicem curae nostrae illis iniungere. Qui conuocatis ex uobis, qui ad aecclesiastica negotia tractanda idonei noscuntur, una uobiscum diligenti examinatione perquirant et inquisitis quibuscumque potuerint, iuste determinationis finem imponant. Quod si contigerit aliquam partem spiritu superbiae ductam nolle obaedire iustitiae, ei parti, quae iustitiam habet, fauere uos uolumus et precipimus, rebellem autem aecclesiastica censura arceri apostolica auctoritate precipimus. Preterea si contigerit aliquo impedimento interueniente predictos legatos ibi simul esse non posse, eis autem, qui fuerint, etiam si unus tantum, similiter ac si simul essent, fraternitatem tuam cauere atque ut mihi, si presens essem, obaedire predicta auctoritate monemus. Vnde predicto Huberto, quem in Britanniam premisimus, cum ad fraternitatem tuam uenire contigerit, in predictis ut mihi cauere, in predictis ut mihi obaedire ammonemus et nobis commissa auctoritate iubemus. Si qua uero sibi fuerint necessaria ut homini, qui a Roma usque ad Britanniam elaborauerit et a Britannia usque Romam, si Deus dederit, modis elaborat uenire, caritas tua sibi impertiri nostri causa et amore non dubitet, ut ex filii intelligatur dilectione, quanto matrem amplectaris amore.