REGEST MABILLE: Charles-le-Chauve, à la demande du comte Vivien, abbé de Saint-Martin, confirme la donation en précaire, faite par le dit abbé à Adalmannus, lévite, d’un bien que son père avait jadis obtenu du chapitre en précaire, savoir la villa appelée Colonica, et deux manses situés au village de Villaines. Adalmannus jouira de ces biens sa vie durant, à la condition de payer chaque année au chapitre, le jour de la Sainte-Luce, trois sous d’argent de cens, quatre muids de vin et huit de seigle, plus douze fromages, et il aura le droit de laisser à sa mort les dits biens à qui il voudra, à la charge de toujours acquitter le dit cens.
REGEST EDITION: Dieses Regest ist nicht öffentlich zugänglich.
Datierung: MABILLE: 849 06 21; EDITION: 849 06 21
EDITION: Tessier, Georges (Hg.): Recueil des actes de Charles II le Chauve, Roi de France. Tome 1, Paris 1943 (Chartes et diplômes relatifs a l’histoire de France 8), S. 303-305, Nr. 114.
In nomine sanctae et individuae Trinitatis. Karolus <Francorum et Aquitanorum> gratia Dei rex. Si utilitatibus fidelium nostrorum nobis juste supplicantium consulimus, id procul dubio proficere ad statum regni nostri corroborandum fidelitatemque nostrorum cumulandam necnon etiam capessendam felicitatis aeternae beatitudinem minime dubitamus. Idcirco noverit omnium fidelium sanctae Dei Ecclesiae nostrorumque, videlicet tam praesentium quam futurorum, industria quia vir venerabilis fidelis noster, Vivianus comes, innotuit culmini dignitatis nostrae quod quidam levita ex coenobio praeclarissimi confessoris Christi Martini, peculiaris patroni nostri, nomine Adalmannus, quoddam proprium hereditatis suae legaliter contulerit Deo et sancto Martino, quod et pater ejus in vita sua jam egerat, ob emeliorationem sanctae Dei Ecclesiae, tempore scilicet Fridegisi abbatis, deprecatusque fuerit per seriem precariae quandam villulam, nomine Colonicam, ex rebus ejusdem ecclesiae, insuper duos mansellos in villa quae vocatur Vitlena, eo scilicet tenore ut utrasque res diebus vitae suae idem Adalmannus habeat atque possideat, unde censuit in festivitate sanctae Luciae, quae est idus decembris, annis singules se daturum ad illud sepulchrum tres solidos argenti ad luminariam concinnandam, et fratribus sancti Martini quatuor modios vini et octo tritici, addens modo, quatenus merces cumuletur et quod agit firmius habeatur, duodecim pensas casei. Igitur petiit serenitatem pietatis nostrae, ob amorem et honorem Domini reverentiamque beati Martini, peculiaris patroni nostri, ut hoc ipsum nostra auctoritate dignaremur confirmare more regali. Nos quoque, salubri suggestione permoti, simul etiam hortatu praefati fidelis nostri Viviani, hoc nostrae auctoritatis praeceptum fieri ac dare decrevimus, per quod constituimus atque perenniter firmum fore decernimus ut, sicut superius dictum est et in serie precariae videtur memoratum beneficium cum omni integritate habeat atque possideat, eo videlicet modo ut annis singulis supradictum censum propria voluntate institutum fratribus sancti Martini solvat, id post suum quoque discessum cuicunque voluerit sub jam dicto censu tenendum relinquat. Unde monemus omnes qui nobis in regno a Deo commisso successuri sunt ut, sicut sua statuta a successoribus suis conservari voluerint, ita in omnibus hanc nostram praecepti auctoritatem super precariam actam confirmandam immutabiliter perpetuis temporibus conservare studeant. Et ut haec nostrae auctoritatis praeceptio firmior habeatur ac per futura tempora melius conservetur inviolataque ab omnibus semper teneatur, eam de anulo nostro insigniri jussimus.
Bartholomaeus notarius ad vicem Hludowici recognovi et subscripsi.
Data XI kal. jul., anno X regnante Karolo glorioso rege, indictione XII. Actum Ausenivilla. In Dei nomine feliciter. Amen.