REGEST MABILLE: Louis-le-Bègue, à la demande des religieux de Saint-Martin, occupés à reconstruire le bourg, situé autour de leur église, brûlé par les Normands, déclare le dit bourg exempt de toute juridiction, autre que celle de l’abbé, du doyen ou des chanoines ; vent que nul ne puisse exiger aucun droit des habitants du dit bourg et que les chanoines puissent vaquer librement et sans empèchement à la reconstruction de leurs églises et de leurs habitations.
REGEST EDITION: Dieses Regest ist nicht öffentlich zugänglich.
Datierung: MABILLE: 878 07 24; EDITION: 878 07 24
EDITION: Grat, Félix, Jacques de Font-Réaulx, Georges Tessier und Robert-Henri Bautier (Hgg.): Recueil des actes de Louis II le Bègue, Louis III et Carloman II rois de France (877-884), Paris 1978 (Chartes et diplômes relatifs à l’histoire de France 12), S. 37-40, Nr. 14.
In nomine Domini Dei aeterni et Salvatoris nostri Jesu Christi. Hludowicus misericordia Dei rex. Decet enim regalis clementiae dignitatem cuncta quae a servis Dei rationabiliter postulata fuerint, sollerti cura prospicere et oportuna ac congrua eis beneficia non denegare, ea quoque quae anteriorum acta regum pro Dei intuitu concedere visa sunt plenius confirmare. Quapropter notum sit omnibus fidelibus sanctae Dei Ecclesiae et nostris, praesentibus scilicet ac futuris, quoniam fratres, viri scilicet venerabiles, ex monasterio sancti Martini in suburbio Turonicae civitatis sito ad nostram accedentes clementiam petierunt suppliciter ut, pro Dei omnipotentis amore ac beatissimi Martini venerabillima religione, sanctorum quoque omnium suffragio, ipsi congregationi celsitudinis nostrae praeceptum fieri juberemus, ut quiete et tranquille in restaurationibus construendarum sibi mansionum quae lamentabili excidio saevis ignibus Nortmannorum depopulatione perierant eos degere liceret et ut quieti ac securi in eisdem mansionibus absque cujuspiam inquietudine esse valerent. Quorum rationabilibus et oportunis precibus assensum praebentes, hoc serenitatis nostrae praeceptum fieri jussimus, per quod praecipimus atque jubemus ut nec nos adventus nostri tempore, nisi pro tantae infirmitatis necessitate, sicuti nunc egisse cognoscimur, ad beatissimum patrem Martinum confugium fecerimus, — quod deinceps Omnipotentis manus clementer avertat! — nec ullus ex ducibus, abbatibus, domesticis, comitibus, grafionibus, centenariis, vicariis vel quicunque judiciaria potestate succinctus seu quilibet missus discurrens aut cujuscumquae potestatis seu dominii reverentia praeditus in supradictorum fratrum mansionibus infra ipsius coenobii septa constructis seu et cellis intra urbem vel burgum Turonicum consistentibus mansionaticum accipere aut ingressum vel introitum ad ipsos inquietandum habere praesumat, sed quicquid saepedicti fratres in eorum mansionibus fundaverint atque construxerint, tam ipsi quamque post eos eorum nutricii ipsius basilicae educati more ejusdem loci quiete et pacifice habeant, teneant et ordinent, ut, dum per nos pacis et quietis utuntur solatio, libere et quiete pro genitore et genitrice nostra, nobis, conjuge ac prole, regni quoque nostri statu Domini misericordiam eos exorare delectet, et nullus fidelium nostrorum hanc indulgentiam et bonitatem praeceptionis nostrae inrumpere aut violare praesumat, sed nostra munificentia quietos esse in eorum mansionibus de reliquo patiantur et ut Ecclesia sancta Dei debitae reverentiae obtineat vigorem laborare decertent. Ut autem haec nostrae munificentiae auctoritas firmam et impraevaricabilem semper in Dei nomine obtineat firmitatem, manu propria subter eam firmavimus et anuli nostri impressione assignari jussimus.
Signum Hludowici gloriosissimi regis.
Vulfardus notarius ad vicem Gozleni recognovit et subscripsit.
Datum VIII kal. augusti, indictione XI, anno I regni domni Hludowici gloriosissimi regis. Actum Turonis monasterio sancti Martini. In Dei nomine feliciter. Amen.