REGEST MABILLE: Donation en précaire faite au comte Ebolus. — Ebolus, fils de Ramnulfe, comte de Poitiers, renouvelle et confirme, pour le repos des âmes de son père et de Gauzbert et d’Ebolus ses oncles, la donation faite à Saint-Martin, par le dit Ramnulfe, d’un alleu situé sur la Charente, dans le pays de Briou et dans la viguerie de Savigné, contenant environ 44 manses, d’un autre alleu situé en Poitou, viguerie de Sauves, près de Doucé, et d’un troisième alleu situé aussi dans le pays de Briou et dans la viguerie de Ville Fagnan. En récompense de cette donation, Fulcrade, doyen, Bernon, trésorier, et le chapitre de Saint-Martin, rendent les dits biens en précaire au donateur, et y ajoutent la ville de Doucé, située en Poitou, moyennant un cens amuel de cent sous, payable à la Saint-Martin d’hiver.
REGEST EDITION: Dieses Regest ist nicht öffentlich zugänglich.
Datierung: MABILLE: 817 07 01; EDITION: 891 10 10
EDITION: Bautier, Robert-Henri (Hg.): Recueil des actes d’Eudes roi de France (888-898), Paris 1967 (Chartes et diplômes relatifs à l’histoire de France 11), S. 227-233, Appendice 3.
Cum multiplex misericordia Dei multis modis remedia poenitentiae generi humano contulisset, hanc etiam laudabilem consolationem unicuique homini non denegavit ut quilibet homo, degens in hac valle lacrimarum et mente considerans nequitiarum suarum multitudinem justo libramine, possit res suas erogare seque redimere, teste Scriptura quia «sicut aqua extinguit ignem, ita elemosina extinguit peccatum» et in Evangelio voce dominica dicitur: «Quicumque dederit calicem aquae frigidae, tantum in nomine meo non perdat mercedem suam». Quamobrem ego Ebolus, juvenili adhuc aetate florens, videns cotidie judicium Dei in minimis et maximis et istius saeculi deciduum lapsum, in quorum intentu meos quidem agnosco casus, ac tractans aetatis meae excessus pavensque diem tenaebrarum et caliginis, quatinus propitium habere merear Creatorem meum ejusque omnes sanctos intercessores maximeque beatum Martinum adjutorem, pro remedio animae genitoris mei Ramnulfi, cujus mercede hujus rationis exordia obtinui, ac avunculorum meorum Gauzberti et Eboli et retributione animae meae seu aliorum meorum parentum, offero omnipotenti Deo ac sancto Martino, confessori suo, seu fratribus ejusdem congregationis, donatumque in perpetuum esse volo, alodum meum proprium quem haereditate paternali hereditavi, nuncupantem Aleriacum, in pago Briosinse, in vicaria Saviniacinse super fluvium Carantum, cum ecclesia in honore sancti Petri constructa et corte dominica ac viridiario, cum vineis, silvis, farinariis duobus, pratis, pascuis, aquis aquarumve decursibus, mobilibus et immobilibus suisque omnibus adjacentiis ac mancipiis utriusque sexus inibi commanentibus, sicut a nobis praesenti tempore possideri videtur, totum ad integrum, cultum et incultum, quaesitum et ad inquirendum, de jure meo in jus et dominationem praedicti patris sancti Martini et fratrum ejusdem congregationis perpetualiter habendum, tradimus et donamus, veluti per instrumenta cartarum ab Adalardo filio Ededonis, nostro propinquo, illum obtinuit pater meus, habentem in se plus minus mansellos XLIIII; et in alio loco similiter dono donatumque esse volo alterum alodum, nuncupantem Ciliacum, in pago Pictavensi, in vicaria Salvinse, prope villam sancti Martini ac eorumdem fratrum nomine Dociacum, cum ecclesia in honore sancti Salvatoris consecrata et aut quam aspiciunt arpennos vineae IIII et quarta una terrae arabilis et juncti de prato IIII, cum corte dominica ac vineis, silvis, pratis, pascuis, rebus mobilibus et immobilibus suisque omnibus adjacentiis ac mancipiis utriusque sexus inibi commanentibus, totum et ad integrum, sicut et a nobis successione paternali possideri videtur, et in jus et dominationem praelibati patris domni Martini suorumque canonicorum perpetualiter dominandum tradimus atque ad habendum confirmamus, per auctoritatem cartarum a genitore meo Ramnulfo, datis suis pretiis, acquisitum a Ramnulfo ejus propinquo, habentem in se plus minus quartas XL; in tertio autem loco, similiter, in sanctae Trinitatis nomine, tertium alodum, nomine Curcolmum, dono et in omni tempore donatum esse volo, cum domibus suis, adjacentiis et cultoribus utriusque sexus debitum inibi servitium facientibus, cum ecclesia et corte dominica, vineis, silvis, pratis, condaminis, terris cultis et incultis, aquis aquarumve decursibus, mobilibus et immobilibus et cum rebus omnibus ad eum pertinentibus; est autem situm in pago Briosinse, in vicaria Villae Famacinsae et habet ibi minus plus quartas XXXIIII. In recompensatione autem tanti beneficii, ut praedicti Eboli oblatio potiorem erga nos obtineat effectum, nos, in Dei nomine, Fulradus, sanctae congregationis beati Martini sacerdos atque decanus, necnon et Berno, sacerdos et archiclavis, ceterique praelibatae congregationis fratres, concedimus, per consensum domni Rotberti abbatis, predicto largitori, scilicet Ebolo, usus fructuario et more precario, easdem res quas sancto Martino et nobis spontanee delegavit et, ut libentius hoc ageret, tribuimus ei ordine precario villam nostram Dotiacum, quam olim orthodoxus rex domnus Karolus ad usus fratrum per suum praeceptum restauravit et, post multum tempus, Magenarius dolo usurpavit et, post eum, filius ejus Osbertus injuste tenuit, sed rursus, domni Odonis regis imperio, Aurelianis civitate, nobis restitutam in praesentia suorum procerum, hoc eodem modo Ramnulfo comiti, per consensum senioris nostri domni Rotberti, consignare disposueramus, quae sita est in pago Pictavis, in vicaria Braciacinse, cum ecclesia in honore sancti Martini constructa, ad quam aspiciunt quartae CVI, vineis, silvula quoque et condaminis, pratis, pascuis suisque omnibus adjacentiis et quicquid ad ipsam villam pertinere videtur, cultum et incultum, totum et ad integrum, de jure nostro in potestatem ac dominationem ejus tradimus atque transfundimus, eo quidem tenore ut tam pro praedictis rebus quas ipse partibus nostris delegavit quam pro praenominatis rebus quas ei precario jure concedimus, annuatim in festivitate sancti Martini autumnali exsolvere studeat in censu nobis ac successoribus nostris argenti solidos C, et sic utrasque res diebus quibus advixerit teneat et precario more possideat. Si vero evenerit ut sponsa ejus, nomine Aremburgis quam per sponsalia jura in futuris nuptiis obarratam habet, prolem ex ipsa habeat, eadem ratione tam ipsa quam et ejus primogenitus filius diebus vitae suae praedictam precariam obtineant sub praedicto censu. Et ut melius ac justius ipsis rebus uti possint, id emeliorare tam aliis alodis quam et in censu ac reliquis serviciis omni modo studeant. Si vero negligentes aut tardi ex jamdicto apparuerint censu, secundum terrae morem et aequitatis justitiam id ipsum emendare quantocius studeant et res quas tenuerint non amittant. Post horum quoque digressum, memoratas omnes res quicumque tunc temporis decanus congregationis Sancti Martini extiterit, cum omni integritate et emelioratione in potestatem fratrum ac dominationem, absque alicujus contradictione aut consignatione, revocare studeat, quatinus deinceps quicquid eis libuerit habeant perpetualiter faciendi potestatem. Illud autem nobis pro tota firmitate inserere placuit quod, si fuerit aliquis, mala voluntate aut cupiditate deceptus, qui hanc precariam ob quaestum rerum nostrarum actam infringere aut inquietare temptaverit, insuper cui molestiam fecerit auri libras XXX coactus exsolvat et sua repetitio nil valeat. Haec vero precaria, nostris aliorumque nobilium hominum manibus roborata, omni tempore firma et stabilis valeat permanere.
Ego Ebolus hujus precariae donum a me factum propria manu subscripsi et reliquos nobiles laicos subter signare rogavi.
S. Adraldi. S. Adalardi comitis. S. Goldini. S. Geroardi. S. Achardi. S. Rainaldi. S. Guilelmi. S. Ungarii. S. Stephani. S. Gauzberti. S. Isembardi. S. Aimerici. S. Gamalfredi vicecomitis. S. Gundoini. S. Eimerici. S. Ermenrici. S. Frotarii. S. Ragemberti. S. Rogenonis. S. Autberti.
Actum Pictavis, ubi facta et firmata fuit, anno Incarnationis Christi DCCCmo XCImo, indictione VIIII, die Xmo mensis octobris, regnante domno
Odone rege anno III.
Ego Rotbertus notarius scripsi et subscripsi.