Salomon de Lavardin et Adèle sa femme fondent à Lavardin, avec le consentement de leurs filles, un prieuré sous l’invocation de Saint-Gildèric, et lui donnent des terres libres et franches de toute charge, à la condition que les moines les comprendront dans leurs prières.
Datierung: 1037-1047
Quanta et quam benignissima circa humanum genus Dei existit pietas, nullus mortalium vel corde cogitare vel verbis dicere potest. Invitat enim nos ut post multa perpetrata scelera ad eum redeamus, pie et misericorditer dicendo: Venite ad me omnes qui laboratis et onerati estis et ego vos reficiam. Et in alio loco evangelii, ortatur nos ut de terrenis rebus atque caducis adquiramus celestia et in eternum mansura taliter inquiens: Facite vobis amicos de mamona iniquitatis, ut cum defeceritis, recipiant vos in aeterna tabernacula. Iccirco ego in Dei nomine Salomon et uxor mea Adela, concedentibus filiabus nostris Matilde et Avelina, nostrorum reminiscentes multitudinem peccatorum et ultimi iudicii diem fortiter expavescentes, atque cum illis fidelibus quibus Deus in illa die dicturus est: Venite, benedicti patris mei, percipite regnum quod vobis paratum est, aggregari desiderantes, donamus ad locum Maioris Monasterii quem Beatus Martinus construxit in honorem Sancte Dei genitricis Marie, et Sanctorum Apostolorum Petri et Pauli consecravit, et monachis ibidem Xristo servientibus, quamdam terram ex canonicis Sancti Georgii comparatam, super ripam Ledi fluvii sitam; in qua videlicet terra construximus ecclesiam in honore Sancti Geldrici confessoris, cui ecclesie de nostris propriis possessionibus donavimus duos scilicet furnilos et unam mansuram de terra in illa villa que vocatur Aferguz, et in terra Sancti Genesii, terram ad unum modium et dimidium sementis, de vineis tres arpennas, de pratis vero IIos arpennas, super aqua que dicitur Breia, que omnia libere et quiete, nemine contradicente, comparatione legali censualiter tenemus atque possidemus, et ad integrum ab hodierna die in posterum, pro redemptione et remedio animarum nostrarum, tradimus supradicto loco Beatissimi Martini et monachis ibi degentibus in perpetuum possidenda. Adhuc autem concedo ipsis monachis, auctorizantibus Adela uxore mea et filiabus nostris Matilde et Avelina, quicquid eis datum vel venditum fuerit ab omnibus hominibus meis, militibus, burgensibus, servis, ingenuis, tam de meo fevo quam de extraneo. De tota vero terra quam dedi supradictis monachis, sive quam adquirere poterint donatione et emptione, habeant ipsi monachi omnes consuetudines et forifacturas semper solutas et quietas, sic et ego de mea quam ego possideo, ea scilicet ratione ut semper memoriam nostri in suis orationibus habeant, et pro nobis peccatoribus Dei clementiam exorent, ut cum nobis dies mortis advenerit, non gaudeat de animabus nostris pestifer inimicus, sed eas per Beati Martini intercessionem eripiat misericordia Xristi de manu diaboli et de penis inferni, et transferat ad gaudia paradisii. Si autem aliquis de fratribus et sororibus, vel nepotibus, seu aliis propinquis, aut ullus unquam homo vel femina contra hanc donationem, quam libera mente et propria voluntate ex nostris rebus facimus, aliquam calumniam monachis post nostrum decessum inferre voluerit, nisi cito humiliatus ad eos ad satisfactionem venerit, in primis Dei omnipotentis et perpetue Virginis Marie atque Beati Petri qui habet claves regni celorum seu gloriosi confessoris Xristi Martini, nec non et omnium electorum Dei iram incurrat, et cum Iuda traditore atque Symone mago, seu omnibus inimicis sancte Dei ecclesie, vivus infernum descendat, et semper ibi ardeat, et veniat super animam eius omne genus infernalium tormentorum per infinita secula seculorum, eiusque calumnia ab omnibus pro nichilo habeatur. Ut igitur hec auctoritas firmior atque stabilior sit, eam manibus nostris subter firmavimus et manibus seniorum nostrorum et multorum virorum nobilium firmandam et corroborandam tradidimus. + Signum Huberti episcopi Andegavensis qui hanc excommunicationem firmavit. + S. Salomonis. S. Adele uxoris eius.
| S. Mahildis eius filie. | S. Aveline eius filie. |
| S. Rogerii generis eorum. | |
| S. Fulcherii Divitis. | S. Viviani. |
| S. Wlgrini. | S. Wilelmi. |
| S. Rainaldi siniscalli. | S. Wineberti. |
| S. Drogonis filii Francherii. | S. Rogerii. |
| S. Fulberti de Rupe. | |
| S. Gaufredi filii Hilgodi. | S. Waldrici. |
| S. Hugonis Burelli. | S. Ildiberti Vigerii. |
| S. Raherii de Boloria. | S. Arnulfi Prefelini. |
| S. Warini. | S. Teoderici Claudi. |
De monachis fuerunt hii:
S. Domni Alberti abbatis.
S. Walterii monachi.
S. Ildeberti monachi.
S. Wilelmi monachi.