None
Datierung: 1032-1064
Nosse debebitis, si qui eritis posteri nostri Majoris scilicet hujus habitatores Monasterii Sancti Martini, Godefredum quendam de Blesis, filium Fulberti, ad quandam ipsius Sancti hiemalem festivitatem, cum Gelduino vicecomite convenisse, et adversum nos calumniam de Engelrico sartore novisse. Asserebat enim, non se nobis eum cum caeteris fratribus ejus, qui a suo in nostrum jus cesserant auctorizasse, sed illum solum exceptum fuisse; de aliis quippe fratribus illius favisse nobis se dicebat, de illo tantum negabat. Unde cum inter nos placitum Blesis ageretur, quidam de fratribus nostris, Hildebertus videlicet et Girardus atque Hildegarius illo missi, praesto in eodem placito quendam hominem nostrum Benedictum Blancharduni cognomine, ad deportandum calidum ferrum habuerunt, qui probaret se audisse et vidisse, nullam Godefredum de Engelrico fecisse separationem, sed illum nobis cum caeteris fratribus annuisse. Qua de re cum inter partes grandis altercatio agitaretur, praedicti fratres nostrum rectum pace quam jurgio exequi maluerunt; petentes itaque concordiam, Godefredo XXXta solidos, ut a caepta calumnia desisteret, obtulerunt. Qui petitioni eorum adquiescens, oblatum precium accepit; et, dimissis totius calumniae querelis, Ingelricum nostrum fore in aeternum denuo auctorizavit. Testibus qui interfuere istis: Otbertus decanus; Ebrardus canonicus Sancti Karileffi; Benedictus canonicus Sanctae Mariae; Hugo filius Haimonis de Rupibus; Rainardus homo Godefredi; Hugo prepositus; Guarinus vicarius; Ebroinus Baconus; Guarinus coquus comitis; Ascelinus serviens comitis; Belinus joculator, qui denarios liberavit; Gauscelmus mercator; Hubaldus major; Rainerius cellararius; Gauterius et Hildradus famuli nostri.