Charte de Rotrou, comte du Perche et seigneur de Bellême, fils de Geoffroy, confirmative de la donation de l’église de Saint-Léonard de Bellême, des églises, biens et privilèges qui en dépendent, en faveur des religieux de Marmoutier immédiats au Saint-Siège. [Union de Saint-Léonard et de Saint-Martin]
Datierung: 1126
In nomine sancte et individue Trinitatis, Patris et Filii, et Spiritus sancti, nos quicumque Christiani sumus debemus omnes bonos actus nostros inchoare mediare et consummare utpote qui non solum de actibus sed et de locutionibus immo et de cogitationibus sumus rationem reddituri, et pro bonis bonum, pro malis vero penas juxta meritum recepturi. Quapropter ego Rotroldus comes Perticensis et dominus Belismensis, filius Gaufredi comitis Perticensis et comitisse Beatricis, cogitans penam malorum et premium bene agentium, elemosinas feodi mei, quas qui me tempore precesserunt religiosis locis contulerunt, studui conservare et confirmare, ut eas conservando et confirmando possim et premiorum participationem promereri. Igitur ecclesiam Sancti Leonardi Belismensis cum omnibus sibi pertinentibus, tam ecclesiis quam altaribus et decimis ; tam villis quam servis et liberis, tam terris quam pratis et vineis cultis et incultis, bosco et plano, ecclesiam ergo illam soli Romane Ecclesie subditam, et ab ea Majori Monasterio beati Martini confirmatam, sicut carta inde facta et privilegia a Romana Sede monachis indulta plenissime testantur ; ecclesiam quoque Sancti Martini Veteris Belismi in cujus parrochia illa Sancti Leonardi sita est, cum omnibus rebus supra nominatis, et cum omnibus que de feodo meo tenebant monachi prefati monasterii eo die quo in manum meam devenit dominatus Castri Belismi, seu omnia que postea adquisierunt, concedo et confirmo eisdem monachis in pace et quiete in perpetuum possidenda, tam pro me quam et pro antecessoribus earumdem elemosinarum auctoribus, sed et pro uxore mea Hauvisa, et pro omnibus tam predecessoribus nostris quam et eis qui de nostra consanguinitate nobis sunt in perpetuum successuri. Et ut plenior inde notitia habeatur, ecclesias quas concedimus nominatim exprimendas decrevimus : Ecclesiam Sancti Salvatoris Belismensis : Ecclesiam Sancti Petri extra murum : Ecclesiam beate Marie de Curtioh : Ecclesiam Sancti Johannis de Foresta : Ecclesiam Sancti Jovini de Danciaco : Ecclesiam Sancti Albini de Buxcello : Ecclesiam Sancti Martini de Curte Leonart : Ecclesiam Sancti Quintini : Ecclesiam Sancti Audoeni de la Curte : Ecclesiam Sancti Audoeni de Pinu : Ecclesiam beate Marie de Ber le Viler : Ecclesiam Sancti Mauricii de Evreciaco : Ecclesiam Sancti Petri de Oreniaco. Et ut firma et inconvulsa stabilitate hec omnia sub jure monachorum supradictorum permaneant, cartulam presentem sigillo nostre auctoritatis firmavimus et in ea signum dominice crucis depinximus, et nostris confirmandam et consignandam tradi precepimus. Eorum autem qui hec viderunt et audierunt seu concesserunt nomina hec sunt : Rainardus presbiter, Hardreus capellanus, Johannes presbiter, Gervasius dapifer, Hugo de Sisiaco, Robertus de Culteleeno, Lancelinus de Belismo, Bauduinus Fortinus, Guillelmus Rufus, Bazardus famulus, Herbertus Oiardus, Mahias, Rainerius Rufinus, Gualterius cocus, Reboginus. Hoc autem ab omnibus sciri volumus quod hanc concessionem seu confirmationem salvo dominatu et justitia nostra, quam antecessores nostri in ecclesia Sancti Leonardi et in omnibus supradictis ad eam pertinentibus habuerunt facimus. Hoc quoque in ecclesia Sancti Martini Yeteris-Belismi et in omnibus aliis ecclesiis ad eam pertinentibus, preterea et in omnibus que predicti monachi de nostro feodo possident retinemus.
Comitis † signum.
Signum † comitisse.
Actum anno ab incarnatione Domini M C XXVI.