Notum sit monachis nostris quod Guillelmus de Braitello abstulerat monachis nostris de Sancto Serenico VII boves propter quasdam novas consuetudines quas monachi eum non sinebant mittere in terra nostra, canes scilicet suos hospitare in burgo nostro et alias plures huic similes. Quod domnus Gaufredus de Malciaco graviter ferens adiit domnum Hoellum, Cenomanensem episcopum, de Guillelmo clamorem facturus. Quem cum audiisset episcopus excommunicavit illum Guillelmum. Ille autem sic coactus presentavit se episcopo in paschali solemnitate et reum se judicans promisit coram episcopo se talem concordiam cum monachis facturum quod ad episcopum ulterius nullum de eo clamorem facerent. Quod et ita factum est. Nam cum ad Braitellum castrum remeasset, adfuit domnus Gaufredus cum eo de bobus placitaturus. Sed cum ille eos non posset reddere quos ille male abstulerat, perdonavit ei monachus VII boves illos tali scilicet conventione quod ille nullam mitteret consuetudinem in terra nostra et quod redderet nobis terram et vineam Richardi cognomento Able manus, et Adeladis grosse quas nobis auferebat necnon et omnia quecumque in tota terra sua habebamus, ita solute et quieta ab omni exactione concederet quemadmodum Hugo antecessor suus sancto Martino et suis monachis donaverat. Quod et fecit, excepta alia vinea et terra quadam quas ad presens reddere noluit; sed post aliquantum temporis spacium reddidit eas domno Guarino, qui in prioratu illius obedientie domno Gaufredo successit. Cujus rei gratia domnus Guarinus redemit quoddam vadimonium illius XIII solidis et illi reddidit. Facta sunt hec anno ab incarnatione Domini Mo XCo, sub domno abbate Bernardo, regnante Philippo rege Francorum. Que quoniam simul facta non sunt, singulorum testes hec inferius dividit charta. De concordia quam cum illo habuit domnus Gaufredus sunt testes hi: de parte Guillelmi Guido Uslabordam, Bernardus Viator; de nostra parte Gaufredus Pilun, Arnulfus Salmere, Hubertus, frater ejus, [Alcherius carpentarius].De eo quod domno Guarino reddidit sunt hi testes: Hugo, frater ipsius Guillelmi, qui et concessit, Hugo Niger in cujus domo concordia facta est, [Giroardus, Alcherus carpentarius, Arnulfus de Salmere, Guido de Villa Chenot, Gaufredus Pilun].