Donation des dîmes de Chahaignes par Emery de la Chartre, chanoine de Saint-Iulien du Mans.
Datierung: 1155-1165
Notum sit omnibus posteris nostris, precipue monachis Maioris monasterii, quod Haimericus de Carcere, canonicus Sancti Iuliani Cenomannensis, in decima de Chaanniis in qua beati Martini monachi prius habebant IIos sextarios, dedit ex sua parte et concessit habere per singulos annos IIos sextarios de frumento et tercium de siligine prefatis monachis per manum donni Roberti, tunc temporis Maioris monasterii abbatis. Facta est autem ista investicio cum mitra sua quam traxit de proprio capite inter capitulum et thalamum donni abbatis, ubi picta est ea historia que sic dicitur: homo quidam descendebat in Iericho et incidit in latrones. Ibi etiam peticionem quam humiliter fecit a donno abbate Roberto impetravit. Hoc viderunt et audierunt de monachis nostri Iungomarus, quondam abbas Sancti Fusciani, Laurentius senex, Guihomarus frater episcopi Evani, Gauterius Baro, Gislebertus cellararius, Helias sacrista et, de clericis, Rivallonius, capellanus de Dormientibus.