Nosse debetis si qui eritis posteri nostri, Maioris scilicet huius habitatores monasterii sancti Martini, Fulconem de Boeria donasse sancto Martino et nobis sub regimine nunc agentibus domni abbatis Alberti ecclesiam eiusdem loci in honorem sanctorum Cyrici et Iulitte constructam, exceptis duabus partibus sepulture et tertia parte omnium illarum primitiarum quas habebat in domininium et tertia rursus parte totius oblationis XIII festorum, hoc est Natalis Domini cum totis octavis, Theophanie, Ypapanti Domini, Pasche cum totis octavis, festi sancti Cyrici et festi sancti Ioannis, et unius sancti Petri de Passione et alterius de Vinculis, et sancte Marie de Assumptione unius et alterius de Nativitate, et Omnium Sanctorum. Cuius scilicet oblationis et primitiarum totius parechie pars nihilominus tertia pertinet ad fevum presbyteri quem et ipsum nostre tradidit ditioni, et terra simul altaris, dimidium fere burdagium apud Montemaigulfi, decima quoque unius carruce Fulconis et mansure que vocatur Cantalupe. Hec sunt fevus presbyteri, exceptis aliis oblationibus totius anni et reliquis que consuetudinarie presbyter de ecclesia quam tenet assequitur. Donavit etiam nobis predictus Fulco in eodem loco decimam unius carruce sue, et medietatem decime duarum mediaturarum de Calloiso et medietatem decime de Fransonaria et unam domum petrinam iuxta ipsam ecclesiam et terram ad faciendum burgum, liberam utramque et domum scilicet et terram ab omni consuetudine, sicut ipse habuerat. Hec omnia nobis sepedictus Fulco per partes primo donaverat, sed postea veniens in capitulum nostrum et adiiciens his ex ecclesia quoque de Gradibus partem tertiam sepulture et decime quam ibidem habebat et partis oblationis que sibi de VII festis proveniebat et consuetudines omnium rerum que in terra sua data vel danda essent nobis, unum donum fecit idque deinde super altare nostre ecclesie posuit. Affuerunt tunc cum ipso Guarinus, filius Ivonis, nepos ipsius, et Marcoardus de Dalmariaco. E quibus Guarinus auctorizavit tunc nobis ecclesiam de Avenariis sicut Bernardus presbyter apud nos deveniens monachus dederat, et mansuram de Geneste quam Fulcodius monachus emerat et quicquid nobis deinceps aut venderetur aut donaretur quod ipse auctorizare deberet. Marcoardus quoque fecit hoc idem de altari ecclesie de Nigronio que est in Ambaziacensi territorio, cum omnibus que pertinere ad idem probantur altare, sicut donaverat nobis Gualterius frater ipsius. Acta sunt hec anno ab incarnatione Domini MLXII, testibus istis Tetbaldo maiore, Bernardo fratre eius, Stephano carpentario, Otgerio carpenterio, Ebulone filio Ebulonis et Marie converse, etc. Huius rei testes sunt Lanbertus Borel, Gaufridus filius Theolini, Fulcodius Bonenlus, etc.