None
Datierung: 1255
Universis presentes litteras inspecturis officialis Carnotensis, salutem in Domino. Noveritis quod in nostra presentia constitutus Guillelmus dictus Piquois contulit et concessit, in puram et perpetuam elemosinam religiosis viris abbati et conventui Maioris Monasterii Turonensis, omnes decimas quas tenebat idem Guillelmus, ut dicebat, in parrochia de Danjolio, Carnotense diocesi, in feodo, ut dicitur, Roscelini de Bardilieres, militis, cum omnibus pertinenciis earumdem decimarum, quas decimas dictus Guillelmus cum omni iure, dominio, possessione et proprietate, si que vel quas habebat et habere poterat in eisdem dictis abbati et conventui in perpetuum quitavit nomine elemosine supradicte, predicta res et dominium et dictas possessionem et proprietatem, si que vel quas habebat et habere poterat in eisdem decimis, in predictos abbatem et conventum et nunc penitus transferendo. Promisit etiam idem Guillelmus pro se et heredibus suis presentibus se et ipsos ad hoc penitus obligando per fidem suam in manu nostra corporaliter prestitam, quod contra predictas quitationem, resignationem et concessionem de cetero non veniet per se vel per alium, nec aliquid iuris in predictis decimis vel eorum aliqua parte in posterum reclamabit, seu petet aliquo iure sive aliqua ratione sive iuris beneficio, nec predictos abbatem et conventum nec eorum monasterium sive mandatum eorum super predictis decimis molestabit, nec ipsos seu eorum mandatum in causam trahet, nec trahi super dictis decimis procurabit. Renuncians omni iuris beneficio canonici et civilis, et etiam beneficio et auxilio litterarum domini pape seu legatorum ipsius impetratarum; volens et concedens dictus Guillelmus Picois, armiger, quod si soror sua vel uxor eius aut heredes ipsius presentes, si aliquis eorum dictos religiosos super eisdem decimis aut collectores eorum nomine dictorum religiosorum impeterent aliquando vel molestarent, aut aliquam violentiam eis inferrent in futurum ipsi religiosi nomine pene haberent et percipient de bonis dicti Guillelmi tam in terris, redditibus, possessionibus quam in rebus aliis ubicumque invenirentur in Carnotense diocessi, usque ad valorem centum marcharum argenti. Et ad hec plenarie facienda et fideliter adimplenda, obligavit se dictus Guillelmus spontaneus uxorem et sororem et omnes heredes suos presentes et omnia alia bona sua, sicut superius sunt expressa, ubicumque fuerint in Carnotense diocesi specialiter et expresse. Dicti vero abbas et conventus attendentes devotionem quam erga ipsos et monasterium suum habebat dictus Guillelmus, ut dicitur, eidem Guillelmo de bonis monasterii predicti usque ad centum marchas argenti pie et caritative contulerunt, ut dicebat idem Guillelmus coram nobis, de qua peccunie summa idem Guillelmus in nostra presentia constitutus ad plenum se tenuit pro pagato, renuncians exceptioni non numerate peccunie non tradite et non solute. In cuius rei testimonium et munimen ad instanciam dicti Guillelmi presentes litteras sigillo curie Carnotensis duximus roborandas, salvo tamen in premissis iure ecclesie Carnotensis. Datum anno Domini Mo CCo Lmo quinto, mense aprili.