«Désistement de Maurice d’Erable, des prétentions qu’il disoit auoir sur la terre de Villers, dépendante du prieuré de Lance, en faveur des abbé et religieux de Marmoutier»
Datierung: 1148
In nomine sancte et indiuidue Trinitatis, Patris, et Filii, et Spiritus Sancti. Ego Engebaldus, Dei gratia Turonorum humilis minister, per presentis paginule noticiam, omnibus fidelibus tam presentibus quam futuris, notum fieri uolo, Mauricium de Erablio, quamdam terram, que Uillatroe uulgo nuncupatur, ad domum de Lanceio pertinentem, monachis beati Martini maioris monasterii calumpniatum fuisse, et ob hoc terram illam incultam aliquandiu remansisse. Sed tandem prefatus Mauricius, diuine miserationis, omnes homines saluos fieri et neminem perire uolentis, gratia respectus, pariterque tormidans, ne propter iniuste calumpnie culpam, sortiretur imperpetuum iuste dampnationis uindictam, ante presentiam nostram constitutus, et terram, quam supra memorauimus, se iniuste calumpniatum fuisse recognouit, omnemque calumniam illam monachis ex integro perdonauit. Et ut maior dictis ipsius fides posset adhiberi, manu propria super sanctum euangelium iurauit, quod iniuste terram illam calumpniatus esset, utpote qui prorsus in ea nichil juris habuisset, nec patrem suum, aut fratrem, aut aliquem ex antecessoribus suis, in ea quicquam juris habuisse uidisset, nec alicuius relacione didicisset.