Karl der Grosse bestimmt für das Kloster Kempten die Befugnisse und Bezüge des Vogtes.
Datierung: 773 04 18
Ausstellungsort: Rom
(C.) In nomine patris et filii et spiritus sancti. Karolus a deo ordinatus augustus magnus pacificus imperator Romanorum gubernans imperium. Quoniam principem et defensorem ecclesiarum nos fecit dominus, ne eius ingrati esse videamur gratie, servitium eius augmentare, ecclesias multiplicare, super bene et oportune inceptis et constructis, ne posthac destruantur, nos oportet invigilare. Iccirco notum sit omnibus fidelibus nostris presentibus scilicet et futuris, qualiter nos audientes et veraciter cognoscentes plerosque eorum, qui ecclesiarum constituuntur advocati, debita potestate in tantum abuti, ut, qui deberent esse modesti defensores, impudenter effecti sint rapaces et iniuriosi exactores, placuit nostre providentie in Audogarii venerandi abbatis Campidonensis monasterii suorumque successorum et fratrum videlicet monachorum hoc perpetualiter potestate ponere, ut sapientum usi consiliis ex eis, quos inter potentes seculi noverint esse equitatis et modestie amantiores, eligant suis conpetenter locis advocatos et defensores, qui nobis parati sint servire et pro ipso abbate in hostem nobiscum pergere. Sed nullus hominum sibi hanc causam vel potestatem presumat vendicare vel quasi hereditariam aut aliquo iure debitam invadere, nisi quem abbatis et monachorum consulta approbatiora velint admittere, eo tamen tenore ut post fidelitatem regio iure nobis nostrisque successoribus factam abbati tria sacramenta iuret: primum, quod secundum posse et nosse iustus ac utilis advocatus in res et homines predicti monasterii existat; secundum, quod, quicquid placitando acquisierit, tertia tantum parte sibi retenta duas abbati reddat et nullum advocatum vel exactorem preter se sine abbatis permissione constituat; tertium, quod nichil privati muneris vel servicii a quolibet loco sive curte seu a cellaerariis quasi ex debito et statuto iure exigat ac mansiones et pernoctationes uspiam frequentare caveant. Quando autem huius commissi [praevaricator] in rebus vel hominibus, quod vulgo balmunt dicitur, exstiterit, statim et sine mora et sine preiuditio , nisi cito resipuerit, advocatia cum omnibus commodis sine spe recuperationis carebit. Ad unumquemque vero locum, quem abbas ad placitandum ordinaverit, cum duodecim viris et totidem equis advocatus semel tantum in anno, nisi pro aliqua necessitate ab abbate sepius advocetur, suscipiatur ac tunc pro terre qualitate preter vinum, quod ibi est rarum, honeste procuretur; infra locum autem Campidonensem nullum placitum nisi rogatu et voluntate abbatis unquam statuat, nullum eiusdem domus dei servientem sine abbate vel ipsius consensu ad iuditium cogat, nullum de familia sine iusta sociorum deliberatione damnet vel coherceat. Et ut hec firmius credantur et diligentius conserventur, manu propria subter firmavimus et anulo nostro insigniri iussimus.
Signum domni Karoli (M.) magni imperatoris augusti.
Amulbertus cancellarius advicem Luitperti archicapellani recognovi et (SR.). (SI. D.)
Data anno ab incarnatione domini DCCLXXIII, indictione XI, anno vero regni magni Karoli VI, imperii primo; actum Romae in sancto die pascae; feliciter amen.