Urkundenbuch des Klosters Fulda; Teil: Bd. 1., (Die Zeit der Äbte Sturmi und Baugulf) (Ed. Stengel) Nr. 78 †
Carolus dei gratia Francorum et Longobardorum rex ac Romanorum patricius. Quidquid ob amorem dei et oportunitatem servorum dei locis venerabilibus concedimus, hoc nobis ad mercedis augmentum et stabilitatem regni nostri provenire confidimus. Quapropter conpertum sit omnium fidelium nostrorum magnitudini, qualiter donamus atque contradimus ad Fuldense monasterium, quod est in honore beatorum apostolorum Petri et Pauli in pago Graphelt constructum, ubi preciosum corpus sanctissimi Bonifacii martiris requiescit, ubi etiam venerabilis Sturmis abbas congregationi monachorum regulariter preesse videtur, quasdam res proprietatis nostrae, id est Hamalo nuncupatum situm in pago Saxoniae cum omni integritate sua, hoc est cum omnibus adiecentiis vel conpertinentiis suis tam terris quam aedificiis, cultis et incultis, silvis, pratis, pascuis, viis et inviis, aquis aquarumque decursibus, mancipiis utriusque sexus, animalibus et cum omnibus hominum substantiis mobilibus et inmobilibus. Damus ergo et contradimus atque in perpetuum donatum esse volumus et nostrae auctoritatis precepto confirmamus eandem nostrae proprietatis rem ad predictum Fuldense monasterium in honore sancti salvatoris et sanctissimi Bonifacii martiris in perpetuam proprietatem ad utilitatem monasterii et venerabilium fratrum deo ibidem devote servientium. Propterea etiam nostrae preceptionis et auctoritatis cartam inde conscribi fecimus, per quam decernimus et in perpetuum ab hac die decretum esse volumus, ut prefato loco et omnibus sibi attinentibus nullus hominum aliquam iniuriam seu violentiam irrogare presumat, sed abbas prefati monasterii suique successores ac fratres sub eis regulariter degentes predictas res de nostra proprietate in suam ditionem transigant, possideant, excolant et ad suam utilitatem, qualicumque modo velint, redigant, ut eo magis eos delectet nos in eorum orationibus deo commendare frequentius. Et ut haec nostrae donationis et confirmationis auctoritas in futuris temporibus firmior habeatur et a cunctis fidelibus diligentius observetur, hanc cartam inde conscribi et anuli nostri impressione eam iussimus insigniri. Signum domni (Monogramm) Caroli gloriosissimi Francorum et Longobardorum regis.