Urkundenbuch des Klosters Fulda; Teil: Bd. 1., (Die Zeit der Äbte Sturmi und Baugulf) (Ed. Stengel) Nr. 8 †
Datierung: <[744-747.]>
Carlomannus et Pippinus dei gratia reges totius Gallie et Germanie ac patricii Romanorum et principes totius senatus cunctis regni principibus omnibusque Christi fidelibus salutem in domino. Decet nos, qui ex regio stemate et nobilissimo principum sanguine sumus progeniti, illorum fidem et liberalitatis honestatem imitari, ita videlicet ut circa dei aecclesias et fidelium fratrum monasteria eandem teneamus devotionis voluntatem, quam et patres ac parentes nostri tenuerunt, qui suis proprietatibus et patrimoniis sanctorum loca pro eternae hereditatis amore ditaverunt et terrenis bonis celestia sibi premia comparare studuerunt. Unde notum fieri volumus cunctis nostris Christique fidelibus, qualiter nos ob amorem aeternorum premiorum pro remedio animarum nostrarum et propter spem vite aeternae et pro parentum nostrorum requiae stabilimus et confirmamus sive etiam ex parte nostra contradimus traditiones parentum nostrorum Pippini videlicet et Caroli, proprietates, hereditates sive qualescunque res sue ditionis sive in Saxonia vel Thuringia, Hassia, Grapheldia, Tullifeldia, Wetereibia, Rinecgevgia, Wormazfeldia, Salegevgia, Baioaria, Sueuia, Alsatia sitas, sancto Bonifacio preciosissimo Christi martiri fratribusque deo famulantibus in Fuldensi monasterio. Insuper et hoc superaddimus donamusque ac contradimus, ut loca ab ipsis conprehensa sive ex novalibus sive qualicunque condicione ex regio nemore possessa teneant, possideant et in suos usus redigant. Ex nostra autem speciali largitate donamus atque contradimus prefato monasterio in honore sancti Bonifacii quatuor villas Geisaha, Ufhusen, Richenbach, Wegefurtam cum omnibus conpertinentiis et appendiciis suis, agris, pratis, campis, silvis, aquis, molendinis, mobilibus et inmobilibus, viis et inviis, exitibus et reditibus, quesitis et inquirendis, domibus, mancipiis et eorum prole, substantia et possessione, censu seu omnimodae servitutis iusticia, in perpetuam proprietatem prefatis fratribus in alimenti et tegimenti consolationem, ut nostri perpetuo sint memores. Sed et hoc superaddimus, ut abbas monasterii venerabilis Ratgerius vel eius successores habeant potestatem in ipso Fuldensi oppido advocationem ad sui monasteri et locorum attinentium defensionem prestare, cui voluerint. Et ut haec traditio nostre auctoritatis et potestatis firmior et credibilior et per succedentium tempora inrefragabilior permaneat, decreto nostre preceptionis firmamus, ut quicunque eam violaverit, regie maiestatis reus existat.